Баллы балан

Бу витаминга бай «дару»ны кышка да әзерләп куйсагыз була.

Балан җиләкләрен кайнар су белән коендырыгыз һәм иләк аша үткәрегез. Шуңа 1:1 нисбәтендә бал кушып, болгатыгыз һәм бер атнага бүлмә температурасында тотыгыз. Ач карынга 1 аш кашыгы кабып куйсагыз – көнлек витамин запасы бар дигән сүз!

Баланны тамак авыртканда һәм тавыш карлыкканда да кулланалар. 1 аш кашыгы баланны бер стакан кайнар суга салып, 2 сәгатькә төреп куегыз. Ангина булганда тамакны шул төнәтмә белән көнгә өч тапкыр чайкагыз, ә тавыш карлыкканда, шулай ук, көненә өч тапкыр берәр аш кашыгы эчеп куегыз.

Бронхиттан, 3 аш кашыгы баланны изеп, 3 аш кашыгы бал белән кушып болгатыгыз. Катнашмага кайнаган әмма бик кайнар булмаган су салып, тотыгыз һәм сөзеп, чәй кебек эчегез. Мондый чәй үпкәләр ялкынсынганнан да яхшы.