11-17 декабрь - сәламәтлеккә җаваплы караш атнасы

Иртәнге гимнастика - 10-20 минут  җитә торган күнегүләр комплексы.

Аны яшькә һәм физик әзерлеккә карамастан ясарга мөмкин. Күнегүләр сайлау элеккеге тәҗрибәгә һәм хәзерге физик формага бәйле - гадидән катлаулыракка таба. Җәрәхәтләнүләр яки авырту синдромы булганда (буыннар яки умыртка баганасы авыртуы), йогышлы авырулар фонында тән температурасы, артериаль басым күтәрелгәндә гимнастикадан тыелып торырга кирәк.

Күнегүләрне уянганнан соң ук, ач килеш эшләү яхшырак. Бераз су эчәргә рөхсәт ителә. Мөмкинлек булса, урамга чыгыгыз. Әгәр дә сез аны өйдә ясыйсыз икән, бүлмәне алдан җилләтү кирәк. Гадәттә, иртәнге гимнастиканың стандарт комплексы төрле мускул төркемнәренә исәпләнгән. Бу утырып яшәү рәвеше алып баручы кешеләр өчен аеруча мөһим.

Игътибарны йөкләнеш интенсивлыгына юнәлтергә кирәк. Иртәнге зарядка организмга зыян түгел, ә файда китерергә һәм энергия бирергә тиеш. Шуңа күрә авыр күнегүләрдән (гантельләр, штанга һ.б.) баш тартырга кирәк.

Иртәнге зарядка гадәттә түбәндәге күнегүләр төркемнәрен үз эченә ала:

• Сулыш алу гимнастикасы. Ул сулыш системасының эшен яхшырта һәм эчке органнарга кислородның актив агымын тәэмин итә.
• Йөрү. Идәндә яланаяк йөрү бик файдалы. Бу очракта күп кенә актив нокталар массажлана.
• Муен гимнастикасы. Мондый күнегүләр бик сак башкарылырга тиеш. Башны әйләндерү файдалы. Алар муен мускулларын ныгытып кына калмый, ә вестибуляр аппаратка әйбәт тәэсир итә.
• Утырулар тез һәм бил буыннарының хәрәкәтчәнлеген арттыра.
• Пресс күнегүләре яссы корсак  формалаштырырга мөмкинлек бирәчәк.
• Аякларны һәм кулларны селкетү мускулларның тонусын күтәрә һәм кан әйләнешен тизләтә.
• Йөгерү, сикерү барлык мускулларны бик яхшы эшләтәчәк. Моннан тыш, алар метаболизмны сизелерлек тизләтәчәк.

Валерия Феоктистова,
Яшел Үзән медицина профилактикасы үзәге табибы