Яшел Үзәндә урманда югалган пенсионерны тапканнар

Ир-атның туганнары иртән иртүк урманга чыгып китүе, адашуы, ә соңрак элемтәгә керүдән туктавы турында хәбәр итә.

Эзләүгә кинолог, участок полиция хезмәткәре һәм җинаятьчеләрне эзләү буенча оперуполномоченный җибәрелә. Алар Яшел Үзән урманчылыгы, шәһәр зираты территориясен, шулай ук Волжск юнәлешендәге спорт базасын тикшерә. Зират артында урманга таба илтүче эзләргә тап булалар. Берничә сәгать эзләгәннән соң, полицейскийлар агач янында талчыккан, өшегән билгеләре булган югалган ир-атны табып ала.

Ир-атны Яшел Үзән хастаханәсенә илтәләр. Хәзерге вакытта пенсионерның тормышына һәм сәламәтлегенә берни дә янамый.