ТР мөселманнары Диния нәзарәте мөселманнар өчен коронавирустан вакцинациянең рөхсәт ителүе турында хәбәр итә

Алынган мәгълүматлардан чыгып, ТР мөселманнары Диния нәзарәте халыкка, шул исәптән мөселманнарга, яңа коронавирус инфекциясеннән саклану максатыннан вакцинация өлкәсендә заманча казанышларны файдалануның рөхсәт ителүе турында хәбәр итә.

Әлеге нәтиҗә кеше тормышының кыйммәтләре һәм аны Аллаһы Тәгаләнең бөек бүләге (Аманат) буларак саклау кирәклеге турында күп тапкырлар белдерүче Коръән һәм Сөннә нигезендә, шулай ук шәригать принциплары һәм кагыйдәләре нигезендә чыгарылган. Шулай итеп, прививканың составына бәйсез рәвештә, эпидемия шартларында вакцинация мөселманнарның гомерен саклап калу өчен рөхсәт ителә.

Шул ук вакытта, вакцинация турында Карар кабул итү өчен, ТР Диния нәзарәте мөселманнарга вирусологларга, иммунологларга һәм йогышлы авырулар белән көрәшү проблемаларын һәм методларын өйрәнү үз компетенцияләренә кергән башка медицина белгечләренә мөрәҗәгать итәргә һәм аларның консультацияләренә иярергә тәкъдим итә.