“Тимер ат”ларны теркәү дәвам итә

“Мирный” автовокзалында урнашкан полиция пунктында  велосипедларга уникаль номерлар сугылып, алар эчке эшләр бүлегенең мәгълүмат базасына кертелде. Акция  көннәр җылына башлау белән велосипедлар урлауларга бәйле рәвештә уздырыла. Былтыр, мәсәлән, 20 “тимер ат” урланган булган. Бу елның апрелендә  Яшел Үзәндә һәм Васильевода 5 велосипедны  урлаганнар.

Белешмә өчен: узган елның апрелендә   Яшел Үзән полициясе хезмәткәрләре “Велосипедыңны сакла!” акциясе кысасында велосипедларны теркәделәр.  Ул вакытта агнда 70 яшел үзәнле катнашты.

Әмма ике көн эчендә генә   бөтен теләүчеләр дә бу чарада катнаша алмады.  Шуңа күрә эчке эшләр җитәкчелеге  велосипедларны  ел әйләнәсендә исәпкә куярга булды. Нәтиҗәдә 2017 елның маеннан сентябрьгә кадәр полиция хезмәткәрләренә 1000нән артык велосипедчы мөрәҗәгать итте. Яшел Үзән эчке эшләр бүлегенең җинаятьчеләрне эзләү бүлеге җитәкчесе Роман Кудрявцев сүзләренә караганда, бу чара үз нәтиҗәсен  күрсәтәчәк әле. Һәр очрашуда профилактик әңгәмәләр уздырылып, велосипед урлауларны 2016 елдагы 32дән 2017 елда 21гә киметү мөмкин булды.

Акциянең икенче этабы 12 майда “Маяк” спорткомплексында 10 сәгатьтән 12 сәгатькә кадәр булачак.

Лилиана Славкина