Татарстанда тәүлеккә 73 яңа коронавирус очрагы ачыкланган

Татарстанда узган тәүлектә таҗ инфекциясенең 73 яңа очрагы ачыкланды. Бу хакта коронавирус буенча оператив штаб хәбәр итә.

Аларның берсе читтән килгән очрак, калганнары - контактлы. 9 кеше хастаханәгә озатылган, 64 кеше өйләрендә дәвалана.

Казанда коронавирустан 45 очрак теркәлгән, Яр Чаллыда - 6, Әлмәт, Югары Ослан районнарында - өчәр, безнең Яшел Үзән, шулай ук Биектау, Чүпрәле, Саба районнарында - икешәр, Азнакай, Апас, Буа, Алабуга, Кама Тамагы, Лаеш, Түбән Кама, Тукай районнарында - берәр.

Бөтен чорда Татарстанда Covid-19ның 9773 очрагы теркәлгән, 8527 кеше сәламәтләнгән, шул исәптән 63 кеше узган тәүлектә.

Кичә республикада коронавирустан өч үлем теркәлгән иде. Үлүчеләр саны 131гә җитте.