Татарстанда оешкан җинаятьчелекне җимерергә сәяси көч һәм республика җитәкчелеге булышлыгы ярдәм итте

Бу хакта Андрей Кузьмин белән әңгәмә вакытында ТР Эчке эшләр министрлыгының элеккеге урынбасары, ТР буенча элеккеге баш федераль инспектор Ренат Тимерҗанов сөйләде.

Аның сүзләренә караганда, «Казан феномены» ның нигезендә илдә дә, шулай ук республикада 1980 һәм 1990 елларда барлыкка килгән социаль-икътисади проблемалар ята. Ә җинаятьчелеккә каршы көрәштә хәлиткеч нокта Татарстан Эчке эшләр министрлыгының йомгаклау коллегияләренең берсендә куелды. Анда ул чакта Татарстанның беренче Президенты Минтимер Шәймиев катнашкан иде.

«Минем докладым бара: элеккечә үк оператив криминоген хәлгә "төркемнәр" һәм аларның лидерлары йогынты ясый, дип мин сөйләп киттем. Ә ул мине кискен рәвештә туктатты да, "Купме коллегияләрдә йөрим, берәр хәл килеп чыкса, моңа группировка, лидерлар йогынты ясый, дип барасыз. Ә сез кайчан боларга каршы эш итә башлаячаксыз?“», – дип искә алды Ренат Тимерҗанов.

Минтимер Шәймиевнең җинаятьчелеккә каршы көрәштә кирәкле корал буларак нәрсә кулланырга кираклеге турындагы соравына җавап итеп, "сәяси яктан ихтыяр көче" дип атаган.

«Мин: “сәяси ихтыяр көче кирәк“, - дим. Ул моңа каршы болай диде: “Мин сезгә аны бирәм“. Һәм Шәймиев безгә эшебездә һәрвакыт ярдәм итте», – дип сөйләде Ренат Тимерҗанов, шул ук вакытта республиканың ул вакыттагы Хөкүмәте ягыннан хокук саклаучыларга зур ярдәм күрсәтелүен билгеләп үтте.