Шәймиев митрополит Феофан турында: Сүз һәм дине белән ул барыбызга да йогынты ясый ала иде

Татарстан Дәүләт Киңәшчесе Минтимер Шәймиев Казан һәм Татарстан митрополиты Феофан белән хушлашты. Ул үзенең бөтен гомерен хезмәт итүгә багышлавын, дөньяның күп кенә илләрендә татулык хакына эшләвен исенә төшерде.

«Бүген без владыка Феофан белән хушлашабыз. Ул гомере буе багышлаган эшкә ничек хезмәт итәргә кирәклеге үрнәге булды. Үз тормышында ул Иерусалимда, Американың көньяк дәүләтләрендә, Камчаткада, Көньяк республикаларда, Россиядә, Уралда хезмәт иткән. Килешүгә ирешергә кирәк булган барлык нокталарда да ул үзен күрсәтте, - дип искә төшерде Шәймиев.

Татарстанлылар хәтерендә митрополит Феофан бердәмлек, игелек һәм иминлек хакына намуслы хезмәт итү үрнәге булып кала. Ләкин ул үзен чиркәү хезмәтчесе буларак кына түгел, сәләтле дипломат буларак та күрсәтте. Ул сүз көче һәм дин белән төрле конфессияләр вәкилләренең тануына иреште, дип билгеләде ТР Дәүләт Киңәшчесе.

"Ул, конфессиясенә бәйсез рәвештә, барыбызга да сүз һәм дин белән йогынты ясый ала иде. Аның тирәсендә берләштеләр, республикабыз мөфтие белән дини конфессияләрнең башка вәкилләре дә үзара аңлашу тапты. Бөек хезмәте өчен аңа рәхмәт ", - дип йомгаклады Минтимер Шәймиев.

Искәртәбез, ул 20 ноябрьдә 74 нче яшендә вафат булды. Мәскәү һәм Бөтен Русь Патриархы Кирилл карары белән митрополит Феофан Казан Богородицкий монастыре территориясендә җирләнәчәк.