Өч ел эчендә Татарстанда авылда яшәүче 6 мең 638 ана түләүләр алды

Агымдагы ел башыннан Татарстанда яшәүче 2 мең 320 авыл хатын-кызы бер тапкыр түләнә торган акчаны: 1909е - беренче бала туганда, 411е - өченче бала туганда алган. Бу хакта ТР Хезмәт министрлыгы матбугат хезмәте хәбәр итә.

«2018 елның 1 гыйнварыннан Татарстанда авыл җирлегендә беренче һәм аннан соңгы балалар тууны өстәмә стимуллаштыру чаралары кертелде. Татарстан территориясендә кимендә өч ел даими яшәүче хатын-кызларга бер тапкыр түләнә торган түләүләр бирелә ", - дип искәртте министрлыкта.

Беренче бала туганда 25 яшькә кадәрге хатын-кызлар 50 мең сум күләмендә түләүләр ала. Өченче һәм аннан соңгы балалар туганда, ана гаиләдә 100 мең сум күләмендә түләү ала. 2018 елның 1 гыйнварыннан 2020 елның 1 ноябренә кадәр бу түләүне авылларда яшәүче 6 мең 638 хатын-кыз алган.