Машиналар күп, ә куяр урын...

Машиналар саны көннән-көн арта, аның белән йорт һәм төрле учреждениеләр тирәсендә парковкаларның җитмәве дә көнүзәк мәсьәлә булып тора.
Машина куяр өчен урыннарны арттырырга тырышалар анысы. Быел, мәсәлән, медицина учреждениеләре янында өстәмә парковкалар барлыкка киләчәк. 
– Халыктан бик күп моң-зарлар ишетәбез. Аеруча Мирныйда Королев урамындагы поликлиника территориясе авырлык тудыра иде. Һәм бу мәсьәләне хәл итүне сорап, район башлыгы Александр Тыгинга мөрәҗәгать иттек, – дип сөйли үзәк район дәваханәсе баш табибы урынбасары Рафаэль Шиһапов. 
Җирле бюджет хисабына парковка үзәк район дәваханәсе һәм Мирныйдагы 3нче поликлиника территория­сендә ясалды. Ә 4нче поликлиника янында төзелеш эшләре әлегә дәвам итә. Масштаблы үзгәрешләр шәһәрнең 9нчы лицей территориясендә дә бара. Лицей бинасы моннан 33 ел элек төзелгән һәм асфальт юлы да яңартуны таләп итә. Һәм быелгы җәйдә җитди үзгәрешләр булыр дип көтелә. Зур территориягә яңа асфальт түшәлүдән тыш, биредә республика программасы буенча футбол мәйданчыгы да төзеләчәк. Моннан тыш чәчәк клумбалары, кече архитектура формалары һәм бөек рус шагыйре А.С.Пушкинга багышланган заманча стендлар да барлыкка киләчәк.