ӘЛЕ ДӘ ЯРЫЙ МӘЧЕТ КАРТЛАРЫ БАР!

273 хуҗалыгында 642 кеше яшәгән Ачасыр кадәр Ачасыр да картлар җилкәсендә утыргач, башка кечерәк авыллар турында әйтәсе дә юк икән! Ә менә шул, түрдән киңәш-фатихасын гына биреп утырасы урынга, бүген дә батырып һәм башлап эшләп йөрүче олыгайган буын да бетсә, нишләргә инде?!

Җыенда да алар актив: килгәннәр дә, яшәгән җирлекләре өчен борчылып мәсьәләләрне дә күтәрделәр. Иң күп яңгыраганы – янгын машинасын карап, финанслап тору һәм моңа якын-тирә авылларны да җәлеп итү. Ник дигәндә, чыгымнарны ачасырлылар күтәрә, ә хезмәтеннән башкалар да файдалана. ПСЧ-154  җитәкчесе  Рәүф Галеев та:
– Сезнең авыл өчен күңел тыныч, чөнки су башнягыз, янгын сүндерү машинагыз бар, юллар чистартылган. Махсус техникагыз тирә-як авылларга да ышаныч булып тора, Норлаттан ярдәм килеп җиткәнче, беренчеләрдән булып янгынны сүндерергә керешә һәм шуның белән бик зур ярдәм итә, – дип мактап кына сөйләгән иде, әллә күз тиде, иртәгәсен үк Олы Ачасырда янгын чыгып, кеше гомере өзелде. Әлеге фаҗигадә, әлбәттә, янгын хезмәте түгел, кешенең тормыш итү рәвеше гаепле. Менә бу хәлләр, чынлап та, янгын сүндерү техникасы белән бәйле мәсьәләнең иң мөһиме булуын тагын бер кат дәлилли. «Бурдан кала, уттан калмый», дип юкка гына әйтмәгәннәр, Аллаһ сакласын!

Тулы язманы газетада укырга мөмкин №10.

Автор фотолары.