Эшсезләргә күбрәк түләнә

Коронавирус инфекциясе пандемиясе белән бәйле рәвештә, эшсез калган гражданнарга ярдәм итү өчен, РФ хөкүмәте 2020 елга эшсезлек буенча пособиенең максималь күләмен 12130 сумга кадәр арттырды. Ул 2020 елның 27 мартындагы 346нчы карары белән расланган.

«Эшсезлек буенча пособие билгеләнгән тәртиптә, эшсез дип танылган гражданнарга мондый статус бирелүнең беренче көненнән үк исәпләнә. Пособие ай саен эшсезләргә эш белән тәэмин итү хезмәте органнары тарафыннан билгеләнгән срокта, әмма айга ике тапкырдан да артмаган очракта түләнә», – дип хәбәр итә прокурор ярдәмчесе Рифат Сафиуллин.