Бакырчыдагы шәл хәлләре

Рухи ачлык кичерә башлагач, Бакырчыга – авыл бәйрәменә юл тоттык.   Эхх, шул авылда уздырган кичләр – эш дисәң эш түгел – җан рәхәте, җәмәгать! Безне инде нәрсә белән шаккатыра алырлар икән, дип барсак та, авыл халкы таба ул юлын. Миләүшә Сәлахиева авылдашлары белән берлектә нинди генә конкурс­лар оештырмады!   Җырлы-бию­ле концерт программасы белән беррәттән, быел кавышуларының юбилейларын билгеләүче парлар да чыкты, кое казучылар да, шәл бәйләүчеләр дә. Коляскалар парадын күргәч, торып кул чабучылыр да шактый булды. Традиция буенча, тантананы Әнәс хәзрәт Закиров ачты. Озын булмаса да, бик күркәм һәм үтемле вәгазен сөйләде. Шуннан, барлык җәмәгать кул күтәреп дога кылды. 
Сәхнәгә беренче булып кое казучылар чакырылды:
– Аллаһ Тәгаләбез каршында савап­лы эш эшләдек, шөкер, – дип башлап җибәрде Бакырчы авылының данлык­лы кое казучысы Рәхимҗан Нәҗиев. – Аның авыр вакытлары да, кызык чаклары да булган инде. Коедан, хәтта, үзләренә хәләл җефетләрен дә алып кайткан ике егетебез бар, – диеп, болай да күңелле халыкның кәефен тагын да күтәреп куйды Рәхимҗан абый. 
Сүзләрен дәвам итеп, бер бик кызыклы чагыштыруны да мисал итеп китерде: 
– Кое казучы абыйларыбыз­ның эш күләмен нәрсә белән чагыштырыйк икән? Әгәр дә барлык казылган коеларның озынлыгын бергә кушсаң – мөгаен, Мәскәүгә барып җитәр иде! 
Рәхимҗан абый сүзләренә Госман Вәлитов тә кушылды:
– Кое казу җиңел түгел, кәнишне, бик авыр эш. Кайвакытта, саксыз кылансаң, өстеңә ишелеп төшүе дә бар. Үземнең дә, тросс өзелеп, 50 килолы авырлык  төшү сәбәпле, умыртка баганам имгәнгән иде. Мин үз гомеремдә биш йөзләп кое эшләдем – төрлесен күргән. Төрле авылларда эшләргә туры килде, Казанда да, Буа, Апас, Чуваш якларында – бармаган җир калмаган инде, –  диде дә Госман, шунда ук үзе чыгарган җырны да җырлап бирде. СөбханАллаһ, дип сокланып утыр­дык. Үзе шундый авыр эштә эшләп («грубый» ир эше бит инде) нечкә күңелле, талантлы егет басып тора иде безнең каршыбызда.

Язманың дәвамын газетада укырга мөмкин ((№54)

Автор фотолары