Авыл халкын тикшерәләр

Хәзер табибка күренәм дисәң дә мең бәла. Талон алырга кирәк, еш кына ул җитми кала, яисә интернет аша язылырга, анда да сине көтеп тормыйлар. Бушлай УЗИ тикшеренүен әйтмим дә, хәзер ул диспансеризация программасына да кертелмәгән.

Яшел Үзән район үзәк дәваханәсенең медицина учрежденияләре табиблары бригадасы авылларга чыга, халык сәламәтлеген кайгырта дигәч, яшермим, гаҗәпләнеп куйган идем. Терапевт, онколог, эндокринолог, кардиолог, гинеколог, УЗИ табиблары, медицина профилактика үзәге белгечләре авылыңа килеп бушлай тикшерү үткәрсен әле! “Добро в село” акциясе кысаларында район үзәк дәваханәсе табиблары Татар Танае, Күгеш, Олы Ачасыр кебек зур авылларга килеп, халык белән очрашкан инде.

-Иң кирәкле белгечләрнең авылга шулай бригада булып күптән килгәннәре юк иде инде. Бу хакта алдан ук белдерү язып, халыкны чакырдык. 100дән артык кеше килде. Һәм һәммәсе дә табиблар кабул итүне оештыручыларга рәхмәт әйтеп китте, - дип сөйли авыл башлыгы Марат Гатиятуллин.

Күгештә исә бригада эшен мәктәптә оештырганнар. Һәр белгеч дистәләнән пациентны кабул иткән. Мәсәлән, терапевт 36 кешене караган, кардиолог – 48, гинеколог – 40, онколог – 50, ә 79 кеше шикәр һәм холестерин күләмен белү өчен кан биргән. УЗИ һәм ЭКГ ясатучылар да шактый.

Яшел Үзән район үзәк дәваханәсенең әлеге акциясе язын дәвам итәчәк.  Хөрмәтле укучыларбыз, бәлки сезнең дә табибларны авылыгызга чакыртасы киләдер, кайсы табибка күренергә теләр идегез? Бу хакта район үзәк дәваханәсенең кабул итү номерына: 6-08-80, йә редакциягә 5-68-03 номеры буенча шалтыртап хәбәр итә аласыз. Хат аша да теләк-тәкъдимнәрегезне җиткерергә мөмкин.