Шикәр урынына – «татлы музыка»

Ризык кешегә файда китерергә, аңа ул яшәү чыганагы булырга тиеш булса да, вакыт уза барган саен алар, әйтик шикәр куллану, начар гадәткә әйләнеп бара. Бу югары калорияле компонент, һичшиксез, организм өчен кирәк. Ул организмда энергиягә әйләнеп, безгә актив тормыш алып барырга ярдәм итә. Әмма без кулланган ашамлыкларның күбесендә шикәр нормадан дистәләгән тапкыр артып китә.

Игътибар итегез: чәй эчәбез икән, аңа шикәр салабыз. Прәннек һәм кәнфитне дә яратабыз. Попкорн, газировкалы су, төрле десертлар, шоколадлар, туңдырмалар һәм башкалар да безнең көндәлек табында.

Энергиягә әйләнү өчен организмга без кулланган кадәр шикәр кирәкми. Алай гына да түгел, тәүлеклек норма өчен без кулланган яшелчә, җимеш һәм боткалардагы глюкоза да җитә. Өстәвенә шикәр, киресенчә, ашыйсы килүне генә арттыра.

Баллы әйберләр күп куллану җыерчыклар чыгара. Ул тиренең коллаген җепселләрендә тупланып, аларның сыгылмалылыгын киметә, шуның белән тире картая. Өстәвенә, бу продукт ирекле радикалларны үзенә тарта.

Әлеге төркем витаминнар күп продукт­ларны, шул исәптән шикәрне үзләштерүдә катнаша. Баллы ашамлыклар күп кулланган очракта, В витаминнары аларны үзләштереп бетерә алмый. Тиз аручанлык, анемия, күз күреме начарлану, йөрәк өянәге килеп чыгарга мөмкин.

Баллы әйберләрне артык куллану инсулин гормонының күп эшләнеп чыгуына, кан басымы күтәрелүгә, холестеринның артуына китерә. Ә артык холестерин кан тамырларына зыян сала.

Баллы ризыклар гипогликемия өянәген чыгарырга мөмкин. Апатия, баш әйләнү, аяк-куллар треморы килеп чыга.

Шикәр теш­ләрне боза дип әйткәнне ишеткәнегез бардыр. Бу, чынлап та, шулай. Чөнки шикәрне үзләштереп бетерү өчен организмга В витаминнары гына түгел, кальций да кирәк.

Җенес органнары гормоннары - тестостерон һәм эстроген эшләп чыгаруны киметә. Нәтиҗәсе - кеше балага уза алмый.

Медиклар фикеренчә, ул иммун системасын 17 тапкырга төшерә! Андый организм вируслар һәм бактерияләр һөҗүменә каршы тора алмый, димәк, кеше авыр инфекция авырулары белән еш авырый.

(Ахыры бар).