Яшел Үзән районында мунчаны яшен суккан

Төнге уникенче яртылар тирәсендә «01» хезмәтенә бер ир шалтырата һәм яшен сугудан мунча януын хәбәр итә. Урынга «Раифа» аерым постының һәм Васильево бистәсеннән 153нче янгын-коткару часте бүлекчәләре чыга. Янгын сүндерүчеләрне йорт хуҗасы каршы алып, мунчада кешеләр һәм газ баллоннары юклыгын аңлата. Бу вакытта мунчаның түбәсен ут каплап алган була. Торак йорт аннан шактый ерак урнашканлыктан янгын таралу куркынычы булмый. Коткаручыларга утны сүндерергә ун минут вакыт җитә. Бәхеткә, бу янгыннан кешеләр үзләре зыян күрми. Әмма мунчаның 16 кв. метрына зыян килә.

Резедә Йосыпова.