Казан мәктәбендә күпләп кешеләрне үтергән егеткә ахыргы гаеп белдергәннәр

Казанның 175нче гимназиясендә күпләп кешеләргә аткан Илназ Галәвиевкә ахыргы гаеп белдергәннәр. Бу хакта җомга көнне, 10 декабрьдә, Россия Тикшерү комитеты хәбәр итә.

Атучыны РФ Җинаять Кодексының дүрт маддәсе буенча гаеплиләр. Аңа ике һәм аннан да күбрәк кешене, шул исәптән кече яшьтәге, гомуми куркыныч ысул белән үтерү, үтерү, шартлаткыч җайланма ясау, милекне аңлы рәвештә куркыныч астына кую керә.

Якын арада җинаять эше материаллары белән зыян күрүчеләр һәм аларның законлы вәкилләре, ә аннары гаепләнүче һәм аның адвокаты таныша башлаячак.

Ноябрь аенда Казанда хокук саклау органнары Галәвиевнең эшен тикшерүчеләргә һөҗүм итүне булдырмый калган. 20 яшьлек ир Якутиядән шәһәргә килгән, гимназия каршында урнашкан һәм тикшерүчеләрне күзәткән. Ул шулай ук корал сатып алу өчен кредит алган һәм аларны атарга әзерләнгән.

19 яшьлек Галәвиев 11 май көнне Казанның 175нче гимназиясендә атыш оештыра. Бу Россиядә соңгы вакытта мәктәптә күпләп кеше үтерү фаҗигасе булды. Тикшерү мәгълүматлары буенча, шартлаудан соң ул атуны оештырган, нәтиҗәдә, җиде бала һәм ике укытучы һәлак булды. Тагын 24 кеше зыян күрде. Галявиевкә гомерлеккә ирегеннән мәхрүм ителү куркынычы яный.