Яшел Үзән укучылары Президент чыршысында

Ә аңа кадәр Казан Кремлендә Татарстан Президенты сәләтле балалары белән очрашып, аларны Яңа ел белән тәбрик итте. Республика җитәкчесе белән очрашуга балалар һәм яшьләр оешмалары вәкилләре, төрле конкурс һәм олимпиада җиңүчеләрен чакырганнар иде. Алар арасында 16нчы мәктәп укучысы, «Татарстан Респуб­ликасының балалар оешмалары советы» төбәк иҗтимагый оешмасы рәисе Тимерхан Шәйхетдинов та бар. 
– Беренчедән, уникаль мөмкинлек тудыр­ган өчен Президентыбызга олы рәхмәтне белдерәм. 2018 ел дәвамында зур уңышлар­га ирешкән 14 бала белән бергә  Татарстан дәүләтчелеге музее белән танышкач, Президент резиденциясенә килеп кердек. Анда без, Рөстәм абыйның кабинеты белән танышып, һәрберебез Президент кәнәфиендә утырып карады. Шуннан соң аралашу өстәл артында дәвам итте. Алып баручы бурычы миндә иде һәм Президент булырга хыялым булгач, җитәкчелеккә хас булырга тиешле сыйфатлар турында сорау бирдем. Ул: «Теләсә нинди дәрәҗәдәге җитәкче тәҗрибәле кеше булырга, илнең төзелешен, муниципалитетларның ничек эшләвен яхшы күзалларга тиеш. Сезгә иң элек районнарда, җирдә эшләп карарга кирәк», – дип җавап бирде. Алга таба әңгәмә яшьтәшләрем сораулары һәм Президентыбызның кызыклы җаваплары белән үрелеп барды. Очрашу ахырында безгә «iPad»лар бүләк ителде. Туган көнемә берәр яхшы планшет аласы иде дип хыялланып яши идем. Яңа елда теләкләр чынга аша! – дип шатлыгы белән уртаклаша Тимерхан.
Ә инде яңа ел каникулында йөздән артык бала Татарстаннан Мәскәүгә илкүләм чыршы бәйрәменә барачак. Бар яктан аерылып торган, ел буе үзен бары яхшы яктан күрсәткән Яшел Үзәннең 40 укучысына да мондый бәхет елмая.

Фото ТР Президент аппараты матбугат хезмәтеннән алынды.