Түләүләр һәм пособиеләр күләмендәге үзгәрешләр

Ана капиталы
Беренче балага ана капиталы февральдән  40 646 сумга арта һәм хәзер 524 527,9 сум тәшкил итә. Икенче бала 2020 елга кадәр туган яки уллыкка алынган ике балалы гаиләләрдә сертификат рәс­миләштерелмәгән яки аннан бер тапкыр да файдаланылмаган очракта, аларга  да шундый ук сумма тиеш була. Гаиләдә ике бала да 2020 елдан соң туган булса, ана капиталының күләме индексациядән соң  53 712,27 сумга арта  һәм  693 144,1 сум тәшкил итә.
Беренче балага капитал алган, аннары тагын бер бала тапкан яки уллыкка алган ата-аналар өчен дәүләт ярдәме күләме өстәмә рәвештә арта. Быел ана капиталы индексация хисабына 168 616,2 сумга җитә. Әлегә ана капиталыннан файдаланмаган гаиләләрнең акчалары шулай ук бу айдан индексацияләнә. Татарстан Республикасы буенча Пенсия фонды органнары тарафыннан ана (гаилә) капиталына 355,1 мең сертификат бирелгән, шуларның 31,2 меңе 2021 елда рәсмиләштерелгән. 

Айлык акчалата түләү һәм социаль хезмәтләр җыелмасы
 1 февральдән айлык акчалата түләүләр 8,4%ка индексацияләнә, аны федераль ташламалардан файдаланучы 317,5 мең татарстанлы ала. Болар – инвалидлар, вете­раннар, техноген һәлакәтләр аркасында радиация йогынтысына дучар булган затлар, Советлар Союзы һәм Россия Федерациясе Геройлары, Социалистик Хезмәт Геройлары һәм Россия Федерациясе Хезмәт Геройлары, шулай ук гражданнарның кайбер башка категорияләре.
  2022 елның 1 февраленнән айлык акчалата түләү белән бергә әлеге төр түләү составына керүче социаль хезмәтләр җыелмасы да индексацияләнә, аның бәясе аена 1 313,44 сум тәшкил итә. 

Җыелма составында: 
дарулар, медицина әйберләре һәм инвалид балалар өчен дәвалау туклануы (акчалата эквивалент – аена 1 011,64 сум),
төп авыруларны профилактикалау өчен шифаханә-курорт дәвалануына юллама (акчалата эквивалент – аена 156,50 сум),
шәһәр яны тимер юл транспортында  бушлай йөрү, шәһәрара транспортта дәвалану урынына бушлай бару һәм кире кайту (акчалата эквивалент – аена 145,30 сум).
 «Ташламалар суммасы айлык акчалата түләү составына керә, аны  файда­лану­чыларның күпчелеге (мәсәлән, инва­лидлар) пенсия белән бергә ала», – дип ачыклык кертә Россия Пенсия фондының Татарстан Республикасы буенча бүлекчәсе идарәчесе Эдуард Вафин.

Социаль пособиеләр һәм компенсацияләр һәм социаль ярдәмнең башка чаралары 
Пенсия фонды балалы гаилә­ләргә, хәрби хезмәткәрләргә һәм радиациядән зарар күргән гаилә­ләр­гә түли торган социаль ярдәм чара­ларының шактый өлеше шулай ук 
1 февральдән 8,4%ка индексацияләнә. 1,5 яшькә кадәрге баланы караган эшләмәүче ата-аналарга һәм опекуннарга ай саен бирелә торган пособие, бала тапканда яисә уллыкка алганда бер тапкыр бирелә торган пособие, радиация йогынтысына дучар булган затларга компенсацияләр һәм башка түләүләр – шундыйлардан. 

Мәет җирләүгә пособие
 Пенсия фонды эшләмәгән  пенсио­нерның вафатыннан соң аның туганна­рына түли торган җирләүгә пособие кү­ләмен дә февральдән арттыра. Бу айдан индек­сация­ләнгән  пособие 6 964,68 сум тәшкил итә.