Татарстанның Актаныш районында Шәймиевнең бюстын ачтылар

Республиканың Актаныш районында, Әнәк авылында, 26 августта Татарстанның беренче Президенты Минтимер Шәймиевка бронза бюстын ачу тантанасы булды. Ачылышта Рөстәм Миңнеханов һәм РФ Президентының Идел буе федераль округындагы вәкаләтле вәкиле урынбасары Игорь Паньшин катнашты.

- Минтимер Шәрип улының тормыш юлы - үсеп килүче татарстанлылар өчен үрнәк һәм ориентир. Нәкъ менә шундый мисалларда без яшь буынны, чын патриотларны тәрбияләргә тиеш, - диде Татарстан Президенты үзенең сәламләү чыгышында.

Тузган торакны бетерү, торак пунктларны газлаштыру, социаль ипотека кебек проектлар һәм программалар Минтимер Шәймиев исеме белән бәйле. Ә аның Болгар һәм Зөяне торгызу проектларын республика халкы гына түгел, Россия һәм чит ил меценатлары да хуплады. Минтимер Шәрипович Болгар ислам академиясен төзү һәм Казан Мәрьям ана иконасы соборын торгызу эшен башлап җибәрде. Бүген республиканың беренче Президенты полилингваль комплекслар челтәрен булдыру проектын гамәлгә ашырып, эшен дәвам итә.

- Шәхсән үз исемемнән Президенттан түгел, шәхсән үзем Минтимер Шәрип улына рәхмәт белдерәм. Сез безнең остаз, - Рөстәм Миңнехановның сүзләрен ТР Президенты матбугат хезмәте китерә.

Бюст Шәрип Шәймиев музей-йорты янында урнаштырылган. Бюст авторы - скульптор Фәнил Вәлиуллин.