Татарстанда биш ел эчендә Россиянең башка төбәкләреннән килүче абитуриентлар саны 20%ка арткан

Бу хакта «Татар-информ» МА ТР Мәгариф һәм фән министрлыгының югары белем бирү бүлеге башлыгы Линар Яруллин хәбәр итте.
"БДИның төп чоры әле тәмамланмаган, ул 2 июльгә кадәр дәвам итәчәк. Тик инде хәзер үк имтихан нәтиҗәләрен белгән чыгарылыш сыйныф укучылары документларны югары уку йортларына, өстәвенә, онлайнга да тапшыра. Мин кичә КФУ, КХТИ, КАИга шалтыраттым, миңа абитуриентларның гариза бирүләрен хәбәр иттеләр. Моннан тыш, документлар, шулай ук, Россиянең башка төбәкләреннән дә актив рәвештә онлайн керә», - дип сөйләде агентлыкның әңгәмәдәше.
Линар Яруллин фикеренчә, БДИның төп чоры тәмамланганнан соң, 2 июльдә вузларга абитуриентлардан гаризалар саны артачак.
"Вузларда документлар 29 июльгә кадәр кабул ителәчәк, кайбер чыгарылыш сыйныф укучылары әле кая укырга керергә дип уйлый. Әле барысы да аттестатлар алмады, аларны узган атнада гына бирә башладылар", - дип билгеләп үтте ул.

Мәгариф һәм фән министрлыгының югары белем бирү бүлеге башлыгы, укырга керүче бер үк вакытта биш вузга кабул итү турында гариза бирү хокукын саклый, дип искәртте. Шул ук вакытта вузга әзерлекнең 10 юнәлешенә кадәр абитуриенттан документларны кабул итү хокукы бирелә. Элек абитуриент документларны өч белгечлеккә генә бирә ала иде.
«Әмма вузлар бу санны үзләре билгеләргә хокуклы. Мин кабул итү комиссияләренә шалтыраттым. Кайбер югары уку йортлары планканы биш юнәлешкә билгеләргә карар иткән, әмма 10ны калдыручы оешмалар да бар. Әлегә әзерлекнең иң популяр юнәлешләре турында сөйләргә иртәрәк, әмма узган елга караганда, документларның күбесен информатика, педагогика, шулай ук техник белгечлекләргә тапшырганнар", - дип ассызыклады Линар Яруллин.
Вузларда кабул итү кампаниясе 20 июньдә башланды һәм көндезге бюджет формасына 17 августка кадәр дәвам итәчәк.

Быел югары уку йортларына документлар бирү механизмы киңәйтелгән. Хәзер моны оешманың үзенең электрон мәгълүмат системасы ярдәмендә яки дәүләт һәм муниципаль хезмәтләрнең бердәм порталында "онлайн вузга керү" суперсервисы ярдәмендә эшләргә мөмкин. Документларны традицион рәвештә кабул итү шулай ук үз көчендә кала.

Конкурс исемлеге исемсез булачак, ягъни килүчеләрнең фамилиясе, исеме, атасының исеме күрсәтелмәячәк. Моның урынына - СНИЛС номеры, ә ул булмаганда - керүченең уникаль коды. Кабул итүнең төп этабының икенче дулкыны юкка чыгарылган. Әгәр дә элек беренче этапта бюджет урыннарының 80% ы тулса, ә икенче этапта калган 20% ы, хәзер исәпләүнең төп дулкыны бер генә булачак.

Беренче чиратта вузлар олимпиадада катнашучыларны, ташламалары булган абитуриентларны һәм максатчан хезмәткәрләрне кабул итәчәк. Аннары абитуриентлар конкурс исемлегеннән төп бюджет урыннарына алына. Конкурс исемлекләре хәзер көн саен көненә биш тапкыр яңартылачак. Бу абитуриентларга рейтингта үз позицияләре турында актуаль мәгълүмат алырга мөмкинлек бирәчәк. Элек мондый яңартуны көнгә бер генә тапкыр үткәрделәр.

2021-2022 уку елына Татарстан югары уку йортлары 20 меңнән артык бюджет урыны бүлеп биргән. Бу, узган ел белән чагыштырганда, 20 процентка күбрәк, дип хәбәр итте “Татар-информ” мәгълүмат агентлыгы.