Татарстан Республикасының шәхси аучылык хуҗалыкларында кабан белән йорт дуңгызларын аталандыра башладылар

Татарстанның кайбер шәхси аучылык хуҗалыкларында дуңгызларның баш санын арттыру өчен кабаннарны өй дуңгызлары белән аталандыра башладылар. Мондый экспериментлар республикада африка дуңгызлар чумасы таралу куркынычын арттыра, дип хәбәр итте «Татар-информ» мәгълүмат агентлыгына биргән интервьюсында «Татохотрыболовство» рәисе Илһам Садыйков.

«Шәхси аучылык хуҗалыклары хуҗаларына поши яки кыр кәҗәләре үрчетү белән шөгыльләнү файдалы түгел, бу бик авыр, мәшәкатьле һәм озак. Кабаннарны үрчетү күпкә отышлырак. Терлекләрнең баш санын арттыру өчен алар хәтта кыргый кабан дуңгызларын гадәти дуңгыз  белән дә аталандыралар. Йорт дуңгызын Кабанга әйләндерү процессы шактый тиз, бары тик бер-ике буын гына кирәк. Аучылар өчен бу хәтта яхшырак та, чөнки мондый гибридларның ите тәмлерәк. Әмма авыру таралу ягыннан бу куркыныч тудыра», - диде Садыйков. 

Әгәр кибеттә дуңгыз ите 200 сумга якын торса, кабан дуңгыз итенең килограммын исәпләгәндә 400-500 сумга төшәргә мөмкин. Атуга Лицензия 15 мең сум тора.

Яңа ел алдыннан Татарстанның Алабуга һәм Зәй районнарында африка дуңгызлар чумасы таралу очраклары ачыкланды. Аерым алганда, Алабуга районында «Түбән Кама» милли паркы территориясендә африка чумасы вирусы белән зарарланган берьюлы берничә үле кабан табылган.