Татарстан Республикасы Авыл хуҗалыгы һәм азык-төлек министрлыгы 5 сентябрьдә Бакчачы көненә багышланган ярминкәгә чакыра

Шәһәр халкы бакчачылар үстергән авыл хуҗалыгы продукциясен сатып ала, төрле конкурсларда һәм мастер-классларда катнаша алачак.

Җиләк-җимеш, яшелчә, җиләк-җимеш куакларын һәм башка продукцияне Казан, Чаллы, шулай ук, Әлмәт, Югары Ослан, Биектау, Яшел Үзән, Лаеш, Түбән Кама, Питрәч, Тукай һәм Чистай районнарының коммерциягә карамаган бакчачылык ширкәтләре алып киләчәк. Ярминкәне, шулай ук, Татарстан кулланучылар берлегенең район бүлекчәләре дә хуплаячак.

Чараның максаты - республика территориясендә бакчачылыкны һәм яшелчәчелек тармагын үстерү. Татарстанда үз җирендә уңыш үстерүчеләрнең барысына да зур хөрмәт белән карыйлар, үз балалары һәм оныкларында җиргә хөрмәт тәрбиялиләр, шуңа күрә бакчачыларга ярдәм итүгә зур игътибар бирелә.

Татарстанда барлыгы 900 бакчачылык коммерцияле булмаган ширкәт теркәлгән. 1 миллионнан артык граждан гомуми мәйданы 20 мең гектар булган 376 мең бакча кишәрлегеннән файдалана. Татарстан җитәкчелеге бакчачыларга актив ярдәм күрсәтә. 2017 елдан бакчачылар проблемаларын хәл итүгә 500 млн. сумнан артык акча бүленә. Шулай итеп, өч ел эшләү дәверендә 1 млрд 650 млн сум күләмендә финансланган. Бу 151 су манарасы урнаштырырга, 83 скважина ремонтларга, 26 км суүткәргеч салырга, каты көнкүреш калдыкларын җыю һәм чыгару өчен 359 мәйданчыкны норматив хәлгә китерергә мөмкинлек бирде. Моннан тыш, 92 км керү юллары ремонтланган, 116 км электрүткәргеч линиясе һәм 118 комплектлы трансформатор подстанциясе эше җайга салынган.

Элегрәк ТР Президенты Рөстәм Миңнеханов агымдагы елда, катлаулы икътисадый шартларга карамастан, бу эш дәвам итәчәк, дип белдерде.

Исегезгә төшерәбез, республикада эчке инфраструктура объектларын ремонтлау буенча бакчачылык ширкәтләре чыгымнарын финанслау программасы эшли. Программаның асылы шунда ки, мәсәлән, СНТ төзекләндерүгә тотылган һәр мең дәүләт өчен тагын ике мең сум өстәячәк. Заявкаларны Татарстан Республикасы Авыл хуҗалыгы һәм азык-төлек министрлыгы кабул итә.