«...шул өйне без инде, әйтәбез бакча, дип...» (Б.Рәхмәт)

Шушы матур бакчабызга, ачык ишекләр көненә әти-әниләр килде. Тәрбиячеләр кунак­ларга һөнәри осталык­ларын күрсәтте һәм әти-әниләр дә дәрестәге мәгълүматны тыңлап кына утырмады, үзләре дә сәләтләрен күрсәтте: чигеп, ябыштырып, буяп карадылар, бармак уеннарын сөйләделәр, әйлән-бәйлән уеннарында катнаш­тылар. Дәресләрдән соң, мөдиребез  Роза Ардыханова кунакларны бакча буйлап экскурсия­гә чакырды. Матур да соң биредә! Кунаклар бездәге пөхтәлеккә, зәвыклыкка, балалар өчен тудырылган уңайлыкларга игътибар итте һәм үзләренең шатлануларын, карашларын белдерде.
Экскурсиядән соң, кунаклар матур итеп бизәлгән музыка залына җыелды. Балалар әти- әниләрне сәламләде, җырлады, шигырьләр сөйләде һәм бергәләп төрле уеннар уйнады.
Без, 23нче «Алтын башак» коллективы хезмәткәрләре, Яшел Үзән районы башлыгы Александр Васильевич Тыгинга һәм шәһәр хакимиятенә бик рәхмәтлебез. Шулай ук төзүчеләргә, бакча тизрәк ачылып, нәниләрне кабул итүне тизләткән һәр кешегә рәхмәтләребезне әйтәбез. Бар уңайлыклары булган бакчада эшләве генә дә ни тора!
Без әти-әниләр белән һәрвакыт тыгыз элемтәдә, алар безнең ярдәмчеләребез, терәгебез. Һәм бергә кулга-кул тотынышып эшләсәк кенә, акыллы, әхлаклы, инсафлы балалар үстерә алачакбыз. Тәрбияле бала – ул синең горурлыгың, өметең, киләчәгең.
«Алтыннан бәһале, оҗмах нигъмәтләреннән кадерле булган нәрсә – тәрбияле баладыр», – дигән Ризаэтдин Фәхретдин. Шуны онытмасак иде.

Лилия Гарипова,
23нче балалар бакчасының татар теле укытучысы

Автор фотосы.