Миңнеханов Казан мэрына шәһәр яннарында юллар үсешен контрольгә алырга кушты

Татарстан Президенты Рөстәм Миңнеханов Казан мэрына шәһәр яннарында юллар үсешен контрольгә алырга кушты. Шәһәр башлыгы республика җитәкчесенә Казан бистәләрен транспорт белән тәэмин итү проектлары турында сөйләде, дип хәбәр итә ТР Президенты матбугат хезмәте.

Анда Көек һәм Салмачи бистәләре, шулай ук «Салават күпере» микрорайоны һәм башка проблемалы юнәлешләр турында сүз барды.

“Без еш кына тарихи үзәкне үстерү һәм саклау мәсьәләләрен карыйбыз, әмма торак микрорайоннар турында да онытырга ярамый. Безнең гражданнар өчен уңайлы яшәү шартлары тудырырга, бөтен инфраструктураны исәпкә алып уңайлы мохит булдырырга кирәк, шул исәптән транспорт инфраструктурасын да», - диде Рөстәм Миңнеханов.

Шуңа бәйле рәвештә ул шәһәр җитәкчелегенә шәһәр яны территорияләренә транспорт белән барып җитү мәсьәләләрен аерым контрольдә тотарга кушты, чөнки Казан территориясе бертуктаусыз киңәя.

Төп бурычлар арасында, Питрәч юнәлешендә юл салу белән беррәттән, Татарстан Президенты Зур Казан боҗрасын төзүнең ике ел дәвамында тәмамлануын һәм «Салават күпере» микрорайонын транспорт белән тәэмин итүне атады. Аның фикеренчә, анда перспективада я трамвай линиясен үткәрергә, я метробуслар җибәрергә кирәк.

Илсур Метшин хәбәр иткәнчә, якын арада мэрия Татарстан Президентына бу мәсьәлә буенча ясалган адымнар турында хәбәр итәчәк.