Яшел Үзәннең 15нче мәктәбендә V «Туган телеңне сакла һәм ярат, үз илеңнең патриоты бул!» фестивале узды

Әлеге проектның авторы, чит телләр укытучыларының методик берләшмәсе җитәкчесе Алсу Амурова, «Татар теле һәм мәдәнияте» юнәлеше буенча проектның автордашы Резедә Гатауллина башка күп кенә остазлар ярдәмендә фестивальне югары дәрәҗәдә оештырырга тырыша.

Төбәк һәм ил халыкларының традицияләренә, туган як мәдәнияте һәм тарихына, лингвистик компетенциягә багышланган фестивальгә шәһәр һәм район мәктәпләре укучыларыннан 159 гариза килгән. Фестивальнең 8 бәйгесендә 300дән артык укучы катнашкан.

Конкурсантларга һәм аларның педагогларына сәламләү сүзен мәктәп директоры Гөлшат Яруллина, район мәгариф идарәсенең өлкән методисты Роза Сәлахова җиткерде. Ул районыбызның күп милләтле халкы дус-тату гомер итүләренә һәм менә шундый бәйгеләрдә үзләренең традицияләрен күрсәтә алуларына басым ясады.

Фестивальнең мактаулы кунагы, Татарстан Халыклары ассамблеясе Советы башкарма комитеты җитәкчесе, ТР Дәүләт Советы депутаты Ренат Вәлиуллин конкурсантларны Халыкара Туган тел көне белән котлап, проектның авторларына, һәр ел фестивальне оештыруда зур көч куйган укытучыларга, мәктәп директорларына Рәхмәт хатлары тапшырды.

– Минем өчен бу аеруча әһәмиятле вакыйга, чөнки тел – ул аралашу чарасы гына түгел, ул халыкның җаны, аның тарихы, мәдәнияте һәм үзенчәлеге. Шунысын да билгеләп үтәргә кирәк, укытучылар белемнәрен тапшырып кына калмый, алар киләчәкне формалаштыра, үсеп килүче буында үз тамырларына мәхәббәт һәм хөрмәт тәрбияли. Безнең көчебез – бердәмлектә, һәр халыкның мәдәния­тен һәм телен хөрмәт итүдә. Туган тел көне Татарстан халыклары арасында дуслыкны һәм үзара аңлашуны ныгытуга тагын бер адым булсын. Туган телебез яңгырасын, милли горурлыгыбыз символы буларак телебез яшәсен һәм чәчәк атсын», — диде Ренат Вәлиуллин укучыларны һәм укытучыларны Халыкара туган тел көне белән котлап.

Елдагыча «Импульс» хореография коллективы, «Русь», «Йолдызым» вокаль ансамбльләре чыгышлары, милли костюм­нар, ризыклар, гомумән үз мәдәниятен, яшәешен тәкъдим иткән конкурсантлар фестивальнең бизәге булды. Берсен алып, икенчесен читкә куярлык түгел. Катнашкан укучыларга һәм әзерләгән педагогларга «афәрин» дип кенә әйтәсе килә.

15нче мәктәптә ун төрле милләт баласы укый. Шуңа да бу үзенә күрә уникаль мохит тудыра, анда укучылар белем алып кына калмый, ә мәдәни төрлелекне хөрмәт итәргә, аңларга һәм дус-тату булып яшәргә өйрәнә. Фестивальнең асылы да шунда. Дәвамлы булсын.