Яшел Үзәннең 5нче гимназиясендә «Аҗаган 2.0» Бөтенроссия хәрби-спорт уенының муниципаль этабы узды

«Алдынгылар хәрәкәте» ярдәмендә оеш­тырылган проектта мәктәпләр бик актив катнаша.

Бу көнне 5нче гимназия бинасы умарта күчедәй гөж килеп торды. Шәһәр һәм районнан 15 отряд көч сынашты. Алар рольләре буенча шәхси (медиклар, политруклар, хәрбиләр) һәм отряд (хәрбиләштерелгән полоса, ут әзерлеге, тактик медицина, гомуми гаскәр грамоталылыгы, строй смотры) сынауларын узды.

Укучыларны район башлыгы Михаил Афанасьев һәм ТР Рәисе ярдәмчесе, Гомумроссия «Беренчеләр хәрәкәте» бала­лар-яшьләр хәрәкәтенең төбәк бүлекчәсе рәисе Тимур Сөләйманов сәламләде.

– Районда «Беренчеләр хәрәкәтенең» сис­темалы эшләве сөендерә. Барлыгы 51 бүлек бар, җитәкчесе Веста Калистратова үз эшен яратып башкара. Аҗаган уены кабат кайтты. Без дә хәрби-патриотик уеннарны көтеп ала идек. Үзебезне күрсәтергә һәм башкаларга карарга менә дигән мөмкинлек бу. Иң мөһиме – «Аҗаган 2.0» безне берләштерә. Һәм барчагызга да уңышлар! – диде Михаил Афанасьев.

– Яшел Үзән һәрвакытта да беренчеләр рәтендә булды. Сез оештырган чараларда катнашуы рәхәт. Теләсә нинди эшне команда булганда гына үстерергә мөмкин. Республикада андый команда бар һәм аны республика Рәисе Рөстәм Миңнеханов җитәкли. «Беренчеләр хәрәкәте» балалар һәм яшүсмерләр оешмасы сезгә кызык булмаса, формаль төстә кәгазьдә генә яшәр иде. Ул сезнең кызыксынуларыгызны исәпкә алып модалы, популяр оешма булырга тиеш. Һәм ничә еллар туктап торган «Аҗаган 2.0» проектын гамәлгә ашырабыз, ул һәр укучының физик әзерлеген, тарих белемен, команда рухын ачык чагылдырачак, – дип фикерләре белән уртаклашты Тимур Сөләйманов.

ФОТОРЕПОРТАЖ

Командалар үз биремнәрен алды, ә кунакларга «Бөек Ватан сугышы геройлары – татарлар» хәрби-патриотик юнәлештәге уникаль музейга экскурсия уздырылды. Искиткеч бай мәгълүмат тупланган, Герой солдатларыбызның исемнәре язылган, хатлары урнаштырылган әлеге музей үткәнебезнең та­ри­хын, батырларыбызның каһарманлыгын ачык чагылдыра. Очрашу ахырында Зеленодольск муниципаль районының бе­ренчеләр советы белән очрашу булды, анда алар Михаил Пав­лович һәм Тимур Җәүдәт улы белән аралашты, үзләрен кызыксындырган сорауларга җаваплар алды. Яшьләрнең активлыгына исең китәрлек, кемдер район башлыгы белән бер эш көнен уздырырга тели, берәүләрнең медиа өлкәсендә кайнап, матбугат хезмәте белән якыннан танышасы килә. Ничек кенә булмасын, «телим», «беләсем килә» дигән кешегә юллар ачык. Бу бигрәк тә, киләчәктә кем булырга дип, ике юл чатында калган яшьләргә ялгыш адым ясамаска ярдәм итә. Һәм җитәкчеләр дә бу юнәлештә булышырга, юл күрсәтергә әзер. Әлеге очрашуда да кыйммәтле киңәшләр, тәкъдимнәр яңгырады.

Ә инде Аҗаган уеннарына килсәк, җиңүчеләр зона ярышларында район данын яклаячак.