Иң яшь балалар бакчасында чыгарылыш кичәсе

Ә менә ислам дине тотучыларның бар таләпләренә дә туры килүче балалар бакчасы Яшел Үзәндә бар. Һәм мондый бакча респуб­ликада бердәнбер, мәдрәсә бинасында 2016нчы елның 1 декабрендә ачыла. Ул чакта 12 бала йөри башлаган булса, бүген малай-кызлар саны – 36.

Шушы көннәрдә «Гөлбакча» балалар бакчасы инде икенче тапкыр бәләкәчләрен олы тормыш юлына – мәктәпкә озатты. Мөселман һәм татар гаиләләрендә тәрбияләнүче сабыйлар өчен биредә бөтен шартлар да тудырылган. Татар, рус теле белән беррәттән гарәп, инглиз теле дә укытыла, балалар белән логопед та шөгыльләнә. Ә иң мөһиме – бәләкәчләр нәни чактан ук әхлак, әдәп, дини тәрбия нигезләренә төшенеп үсә.
– Шәһәребез мөселманнарының уртак бер проекты бу. Һәм әлеге проект күп кешенең проблемаларын хәл итте. Балалар ике төркемдә тәрбияләнә. Өстенлеге шунда: алар кечкенәдән үзебезнең ана телендә сөйләшеп, шул ук вакытта рус һәм чит телләрне дә өйрәнеп үсә. Шуңа да теләге булаганнарны безнең бакчада көтеп калабыз, килсеннәр, – ди районның имам-хатыйбы Габделхәмит хәзрәт Зиннәтуллин.
Узган ел «Гөлбакча» белән 4 бала гына хушлашса, быел 7 булачак укучы тәрбияче апаларына рәхмәт сүзләрен җиткереп, әти-әниләре алдында өйрәнгән сәләтләрен дә күрсәтте. Татар, гарәп, инглиз телендә җырладылар, догалар сөйләделәр, «Йомры күмәч» әкиятен бик оста итеп, без белгәнчә түгел, ә бөтенләй башка форматта уйнап күрсәттеләр. Асылында Аллаһ Тәгаләгә ышану, әхлаклы, тәрбияле булу ята. Балаларга изге теләкләрен район мөхтәсибе Габделхәмит хәзрәт Зиннәтуллин да җиткерде. Ә мәдрәсә һәм балалар бакчасына даими ярдәм итеп торучы, изге күңелле иганәче Әнвәр Миңнуллин бүләк итеп, букчалар тапшырды.
Шәһәребезнең иң яшь балалар бакчасының гомере озын, ә бирегә килүче сабыйларыбызның күп булуын теләп калабыз. Икенче, өченче баласын көтүче авырлы әниләр бары тик шушы бакчага гына киләбез дип ышандырды бит. Амин, шулай була күрсен.