Грипп белән чирләп киттең икән

Ютәлләүче, төчкерүче авыру кеше инфекция чыганагы булып тора. Аеруча беренче 3-4 көндә авыручыда башкаларга чирне йоктыру куркынычы зур. Гриппның инкубацион вакыты берничә сәгатьтән 3-4 тәүлеккә кадәр сузылырга мөмкин.
Өшү, калтырау, баш авырту (аеруча маңгай һәм чигәләр), югары температура, куллар-аяклар, сөякләр, күзләр авырту барлыкка килә.
Беренче тәүлектә тамак кибә, әрнеп тора, борын тыгыла. Икенче-өченче көннәрдә коры ютәл, күкрәктә авырту тойгысы, бераз томау башлана.

Әгәр авырдыгыз икән:
* Башкаларга йоктырмас һәм өзлекмәс өчен өйдә калуыгыз кулай, урамга чыгып йөрмәгез.
* Авыруны аяк өсте үткәрмәгез, ятыгыз.
* Гаилә әгьзалары белән аралашмаска тырышыгыз.
* Авыруның беренче билгеләрен сизү белән табиб чакыртыгыз.
* Бер генә тапкыр кулланыла торган кулъяулыкларыгыз булсын. Куллангач, аларны шунда ук ташлагыз.
* Күп итеп витаминлы эчемлекләр, морслар эчегез.
* Табиб күрсәтмәләрен төгәл үтәгез.
Әгәр гаиләдә берәрсе чирләп китсә, түбәндәгеләрне эшләргә кирәк:
* Аны башкалардан аерып аерым бүлмәгә урнаштырырга.
* Авыруны караучы бер генә кеше булса яхшы. Ул йөкле хатын-кыз булмасын.
* Барлык гаилә әгъзалары битлек кию, кулларны еш юып тору кебек гигиена чараларын үтәргә тиеш.
* Авыруга бер метрдан да якынрак килмәгез.
* Чирле кеше өчен аерым савыт-саба тотыгыз.
* Авыруга игътибарлы булырга, хәле кискенләшкән очракта табиб чакырырга кирәк.