«Алга таба ничек яшәрмен»: 4 бала атасы СВОда һәлак булган

29 яшендә гомере өзелгән Камил Шакиров – Балык Бистәсе районы егете. Аның үлеме күпләрнең күңелен телгәләде. Моңлы итеп җырлавы белән интернет дөньясында шактый танылып өлгергән иде ул. Аны соңгы юлга озатырга килгән халык Юлсубино урамнарына сыймады. Берничә көн элек Камилнең җидесен уздырдылар.

Бик авыр булса да, хатыны Әдилә сабыр булырга, хәсрәтен эчкә йотарга тырыша. Безнең белән дә сөйләшергә көч тапты ул.

– Өлешчә мобилизация башлангач, иремә 2022 елның сентябрендә повестка килде. Камил узган көз ялга кайткан иде. 9 декабрьдән соң аннан хәбәр килми башлады. Яхшыга өметләндек. 15 декабрьдән хәбәрсез югалганнар исемлегендә иде. Өметне барыбер өзмәдек. Без аны өч ай көттек, – дип сөйли Әдилә. – Менә-менә элемтәгә чыгар да, мин исән, дияр төсле иде. Ул бит беркайчан да югалып калмады. Камилнең җәсәден алып кайтабыз дигәнгә дә ышанмадым. Ул түгелдер дидем. Төшләрнең дә яхшысы гына керде. Бер дә иремне югалтырмын, үзем тол, балаларым ятим калыр, дип уйламадым.

Камил Әдиләнең апрельдә игезәк кызлар табасын белеп китә. Бервакыт язышканда, Камил шаярып кына, әйдә игезәкләр алып кайтабыз, дигән була. Янәсе, дүрт баласы булса, ул гаиләсе янына бөтенләйгә кайтачак. Бөтенләйгә аның мәете кайтты. Ә балалар әтисез калды.

– Мин аны армиядән көтеп алдым. 3 ел очрашып йөреп, гаилә корган идек. Иремне бик яратып яшәдем. Ул миңа җил-давыл тидермәде. Аның сүзен тыңлый идем. Камилнең беркайчан да ялгышканы булмады. Бик изге күңелле, кешелекле иде ул. Әмма бирешмәскә тырышам. «Әнием» дип торган ике кызым, әле туарга өлгермәгән ике сабыем бар. Миңа аларга әти дә, әни дә буласы бит, – ди Әдилә. – Авыр чакларда таянырдай кешеләрем бар. Ике яктан әти-әниләребез дә – терәк. Барысы да кайгымны җиңеләйтергә тырыша. Күңелдәге хисләрне әйтеп аңлатырлык түгел инде аны. Йөрәк яраларым мәңге төзәлә алмас инде.    

Камилнең әтисе Фәнил дә: «Без ничек тә түзәрбез, Әдиләгә бик авыр», – ди.

– Хатыным Гөлүсә белән ике ул үстердек. Олысы – Камил, ә кечесе Алмазны 15 елдан соң алып кайттык. Ул 8 нче сыйныфта гына укый әле. Камил кечкенәдән курку белмәс, батыр йөрәкле булды. Кешелеклелеге белән аерылып торды. Кемгә булышасы бар, шунда йөгерде. Авыл кешеләре барыбыз да шундый бит инде без, – ди ул. – Улым хәбәрсез югалганнар исемлегенә эләккәч, аны эзләргә дип, Ростовка да бардым. ДНК анализлары тапшырсак та, күңел ышанмады. Әле алып кайтып җирләгәч тә ышанмыйбыз. Безне сөендереп, кайтып керер кебек.

Фәнил Шакиров улын соңгы юлга озатырга килгән һәр кешегә рәхмәтен әйтә. Бик күп була алар.

– Мөслим егете – үзе шагыйрь, үзе волонтер Рүзәл Минһаҗев СВОга күчтәнәчләр алып баргач, Камил белән танышкан. Без аның артыннан кирәк-яраклар җибәрә идек. Улым үтенече буенча, Рүзәл кайткан саен безгә сугыла иде. Бер ялга кайткан вакытында Фирдүс Тямаевның Чаллыдагы концертына да чакырдылар. Шул чакта Фирдүс Камилгә машина биреп җибәргән иде. Бу егетләргә ничек рәхмәт әйтмисең, – ди Фәнил.

Шакировлар тиздән тагын ике оныклы булачак. Апрель башында Әдилә бала тудыру йортына керә.

– Гыйнвар аенда Әдиләгә операция ясадылар. Табиблар аны Екатеринбургка җибәрделәр. Икәү бардык. Улым кызыбызны безгә ышанып тапшырды инде ул. Камилебезнең рухы шат булсын дип яшәрбез. Ничек тә балаларны да бергәләп аякка бастырырбыз, – ди каенатасы. – Безгә генә түгел, илгә килгән хәсрәт дип тынычланабыз. Күрше авылларга да, безгә дә егетләрнең җәсәдләре кайтып тора. Әле ярый, мәете булса да кайтты, дип шөкер итәбез. Еллар буе хәбәр белә алмый интегүчеләр бар бит. Балаларын югалткан әти-әниләргә сабырлык телим. Япь-яшь килеш тол калган хатыннар, ятим калган сабыйларны юатыр сүзләр юк. Тизрәк илләр тынычлансын иде инде.

Гөлгенә Шиһапова, Ватаным Татарстан