2 яшьлек кыз бала һәм әнисе – юл корбаны

26 майда  кичке алтылар тирәсендә Мәскәү – Уфа юлында прицеплы «Вольво» автомобилен йөртүче 36 яшьлек ир Новониколаевский авылы янында рульдә  34 яшьлек хатын-кыз утырган «Шевроле Круз» автомобилен бәрдергән. Бу бәрелүдән «Шевроле» үзе дә алда торган «Лада Приора» автомобиленә барып бәрелә. Ә «Лада» үз чиратында «Ниссан Альмера»га. Нәтиҗәдә «Ниссан» автомобиле  каршы юнәлешкә чыгып,  светофор сигналын көтеп басып торган «Газель» һәм «Фольксваген-Ниссан» автомобильләрен бәрдерә. 
Әлеге ДТПда «Шевроле»нең йөртүчесе, 8 яшьлек бала  имгәнеп, аларны дәваханәгә  алып китәләр. «Лада-Приора» автомобилен йөртүчене һәм пассажирын – Казанның 7нче шәһәр хастаханәсенә озаталар. Иң кызганычы шунда: «Шевроле»нең 2 яшьлек пассажиры авария булган урында ук, ә аның 34 яшьлек әнисе дәваханәдә алган җәрәхәтләреннән үлә. Кеше гомерен минутлар-секундлар хәл итә. Бик сак булырга кирәк тә бит...  
Шушы коточкыч һәлакәттә гомере өзелгән Яковлева Елена Сергеевна «Яшел Үзән сөт эшкәртү комбинаты»ның юридик бүлеген җитәкли. Коллегалары аны якты, киң күңелле, чын профессионал кеше буларак искә ала һәм аны белгән һәркем юмартлыгы, тыйнаклыгы, чын кеше булуы өчен хөрмәт итә. Коллектив, шулай ук, редакциябез хезмәткәрләре якыннарының һәм туганнарының тирән кайгысын уртаклаша.