«Халык фронты» кызларына зур бүләк – сәяхәт

Алар бу хакта сөйләп, үзләре турында белгертүне яратмый, ә эшләрен чын йөрәктән, ихлас, күңел өчен башкара.

Мондый затлы кешеләрне халыкта «алтын йөрәкле кеше» дип атыйлар. Андыйларга авылдашыбыз Фәрит Зыятдиновны да кертергә була. Ул якташлары өчен бик күп файдалы һәм кирәкле эшләр башкарырга өлгерде инде: Мулла Иле һәм Зур Өтәк авылларында мәчетләр төзүдә, Норлат һәм Татар Исламы авылларында чишмәләрне, Җиңү паркын төзекләндерүдә, Казан хосписына, хәрби гос­питальгә, янгыннан зыян күрүчеләргә ярдәм итү, күперне ремонтлау, ветераннар, халык бәйрәмнәре өчен мәдәни-массакүләм чаралар үткәрүгә финанс ярдәме күрсәтү һәм башка бик күп эшләр. Кем дә кем аның янына ярдәм сорап килсә, ул һәрвакыт мөмкин булганча булышырга әзер, беркемне дә игътибарсыз һәм ярдәмсез калдырмый.

Әлфия һәм Фәрит Зыятдиновларның улы Рөстәм бер елга якын инде махсус хәрби операция зонасында. Алар аның өчен борчылып яши, әмма үзләренең уллары турында гына түгел, ә фронттагы барлык сугышчылар, Норлат һәм күрше-тирә авыллардан хәрби операциядә катнашучыларның гаиләләре турында да кайгырталар.

Фәрит Ярхәм улы солдат әниләре һәм хатыннары өчен бәйрәм табыннарын әзерләүдә күп тапкырлар иганәлек итте, ә 25 июньдә ул фронтовикларның туганнарына, «халык фронты» волонтерлары – маскировка челтәрләре, блиндаж шәмнәре ясаучы, сугышчыларыбыз өчен посылкалар җибәрүче хатын-кызларга да көтелмәгән шатлык бүләк итте – тарихи Алабуга шәһәренә туристлык сәфәре оештырды.

Алабуга – атаклы «кавалерист-кыз» Надежда Дурова гомеренең соңгы елларын үткәргән шәһәр, бөек рәссам-пейзажчы Иван Шишкинның туган җире, XX гасырның иң атаклы шагыйрәләренең берсе – Марина Цветаеваның фаҗигале үлеме урыны. Шәһәргә бару авыл хатын-кызлары өчен зур вакыйга булды. Алар рәссам Иван Шишкин, танылган шагыйрә Марина Цветаева һәм хатын-кыз кавалерист Надежда Дурова музейларында, шәһәрнең башка истәлекле урыннарында булдылар.

Алабуганың кабатланмас пейзажы: Идел буе Болгары чоры һәйкәле – «Шайтан шәһәрчеге» торган биек яр, Кама һәм Тойма елгалары кушылу урыны, матур Шишкин урманнары безнең хатын-кызларда зур соклану уятты…
Алабуга буйлап экскурсия, «Таҗикстан» кафесында туклыклы төшке аш, сувенирлар кибетендә йөрүгә алты сәгать вакыт китте. Бу вакыт эчендә безнең туристлар бер-берсе белән танышты, бу искиткеч шәһәргә гашыйк булырга өлгерде.
Кайтканда барысы да Алабугада күргәннәре белән уртаклашты, сатып алынган сувенирларын күрсәтте. Шундый матур сәяхәте өчен күңелләр Фәрит Ярхәм улына карата рәхмәт хисләре белән тулды.

Ни өчен мондый чыгымлы сәяхәтне оештыруы турындагы сорауга, Фәрит Ярхәм улы: «Мин авылдашларыбызның көздән алып бүгенге көнгә кадәр армый-талмый эшләвен күзәтәм: маскировка челтәрләре үрәләр, блиндаж шәмнәре ясыйлар, җылы әйберләр бәйлиләр, фронтка җибәрер өчен посылкалар әзерлиләр һәм мин аларга риясыз хезмәтләре, сугышчыларга ярдәм итү теләге өчен ничек рәхмәт әйтә алуым турында уйладым. Бу сәяхәт – тыл хезмәтчәннәренә һәм хәзер мораль ярдәмгә мохтаҗ булган солдат аналарына һәм хатыннарына чиксез рәхмәтемнең кечкенә тамчысы гына», – дип җавап бирде.

Норлат зонасының 9 авылыннан килгән «халык фронты» волонтерларына һәм әниләренә Алабугага онытылмас сәфәр танышырга һәм дуслашырга булышты. Фронтка ярдәм итүнең игелекле эшенә ярдәм итү йөзеннән, сәфәрдә катнашучылар тукыма сатып алу өчен 15 мең сум акча җыйды, аннан Норлат ветераннары маскировка челтәрләре ясыячак.
Шундый күңелләргә хуш килерлек, истәлекле сәяхәт оештырган хөрмәтле Фәрит Зыятдиновның игелекле гамәлләре әҗер-саваплар булып кабул ителсен һәм яхшылык­лар булып үзенә кайтсын.

Роза Ягудина,
Норлат «Ак калфак» иҗтимагый берләшмәсе җитәкчесе