Тоткан уразаларыбыз кабул булсын!

Аллаһ Сөбханә вә Тәгалә Коръәни Кәримнең «Әл-Бәкарә» сүрәсенең 183нче аятендә әйтә: «Әй, иман китергән бәндәләр, сездән элекке кавемнәргә фарыз булган шикелле, сезгә дә ураза фарыз булды, дип, белдерде». Аллаһ Раббыбыз Коръәни Кәримдә бәндәләргә төрлечә эндәшә. Ә менә ураза турында әйткәндә: «Әй, иман китергән бәндәләр», – ди.

Чөнки Аллаһ Тәгалә белә: иман китермәгән, иманы зәгыйфь кешенең ураза тотарга көченнән килми. Кайберәүләр, вакытым юк, эшем күп, дип сылтауны бар итә. Мондый кешеләр Аллаһның бик зур рәхмәтеннән коры кала. Ураза тоту үз нәфесең белән көрәшү бит ул. Нәфесеңә хуҗа була белсәң, җан рәхәтлеген тоясың. Таң беленгәннән алып кояш баеганга кадәр ашау-эчүдән тыелып тору, Аллаһның боерыгын үти алу – зур бәхет ул.

Безнең Осиново бистәсендә бүгенге көндә 4 мәчет, Аллаһ йортлары Рамазан аеның һәр көнендә халыкны ифтар мәҗлесләре белән шатландырып торды.

«Әл-Ислях» мәчетендә (имамы Фәрит хәзрәт) көн саен 100дән артык кеше ифтарга килеп, бик канәгать булып, догалар кылып, вәгазь тыңлап, тәравих намазлары укып, Аллаһ Раббыбызга гыйбадәттә булды. Шушы мәчетебезне төзеп калдырган, аның эшчәнлегенә зур өлеш керткән Фәһим Фәхруллинның да рухы шат булсын. Ул башлаган эш дәвам итә, булган әҗер-саваплар аның рухына да барып ирешсен, йә, Аллаһ, дип догада булдык без.

Илебезгә, җиребезгә тынычлык бир, үзебезгә, балаларга, оныкларга тәүфикъ, һидаять бир, иман байлыгы белән бүләклә, йә, Раббыбыз, дип ялварып сорадык, үзебезнең Аллаһ каршында җавап бирәчәгебезне кабат-кабат искә төшердек. ӘлхәмдулилЛәһ, көтеп алган Рамазан аебыз тәмамланып килә. Аллаһ тоткан уразаларыбызны кабул итсен. Һәммәбезгә дә ике дөнья бәхете бирсен.

Тәнзилә Заһитова. Осиново