Осиновода бистәсендә универсаль спорт залы ачылды

 Чарада Яшел Үзән районы башлыгы Михаил Афанасьев, вице-премьер - ТР икътисад министры Мидхәт Шаһиәхмәтов, РФ Дәүләт Думасы депутаты Илдар Гыйльметдинов катнашты.

Залны төзү 2020 елның апрелендә башланган иде, ноябрьдә төгәлләнде. Гомуми мәйдан: 1432 кв.м. 1 катта күнегү дәресләре, баскетбол, волейбол һәм мини-футбол буенча җирле дәрәҗәдәге ярышлар өчен билгеләнгән универсаль спорт залы урнаштырылган. 2 катта 190 кв.м. мәйданны билүче зал урын алган.
Проект нигезендә яңа универсаль спорт залында массакүләм спорт төрләре - баскетбол, волейбол, мини-футбол белән шөгыльләнү мөмкинлеге каралган. Бинада чишенү, душ бүлмәләре, тренажерлар өчен мәйданчыклар бар.

Михаил Афанасьев үз чыгышында Осиновоның мондый объектка мохтаҗ булуын билгеләп үтте һәм Рөстәм Миңнехановка, республика җитәкчелегенә спорт корылмаларын төзү программасын гамәлгә ашыру өчен рәхмәт белдерде. Шулай ук, ул халыкны спорт белән актив шөгыльләнергә, актив яшәү рәвеше алып барырга өндәде, яхшы нәтиҗәләргә ирешү теләде.

Мидхәт Шаһиәхмәтов Татарстанда халыкның тормыш сыйфатын яхшыртуга һәм уңайлы шартлар булдыруга зур игътибар бирелүен әйтте. Ул спортзалга ихтыяҗ зур булачагына ышаныч белдерде. Илдар Гыйльметдинов сүзләренә караганда, спорт белән шөгыльләнү өчен бик яхшы шартлар тудырыла - бу федераль программалар да, республика программалары ярдәмендә гамәлгә ашырыла. Шулай ук ул барысын да әлеге вакыйга белән котлады.