Олы авылны кечесе белән бөек исем берләштерә

ФОТОРЕПОРТАЖ

Сессияләрне генә көткән, диярсең. Ә авыл халкы салкыннардан да, әйләнеп-тулганып искән җил-бураннардан да, әлбәттә инде, кыенлыклардан да куркып кала торганнардан түгел: юллар кардан чистартыла, өйләр җылытыла, терлекләр ашатыла, балалар укырга бара.

Шырдан сессиясе иске, әмма җылы итеп ягылган һәм кунакчыллыгы белән үзгә мәдәният йортында узды. Анда, Яшел Үзән муниципаль районы башлыгы урынбасары Николай Бызин җитәкчелегендә, җирле депутатлар, авыл җирлегендә яшәүчеләр катнашты.

Биредә дә, башка авыллардагы кебек үк, бер-берсенә охшаш проблемалар туып һәм булып тора. Кайсысы тиз хәл ителә, ә кайберләре артыннан дәгъвалап та йөрергә туры килә. Нишлисең, дөнья безнең хәзер шундый. Охшашлыклар күп булса да, Шырдан ягы барыбер дә үзгә. Бу яклар бөек мәгърифәтче Каюм Насыйри эзләрен саклый. Өстәвенә, быел Шырданда гына түгел, бөтен Татарстан халкы бөек якташыбызның 200 еллык күркәм юбилеен билгеләргә җыена. Шулай булгач, бу авыл җирлегенә тыныч кына үз көнен көтеп утырырга түгел, ә юбилей чараларында актив катнашырга, нык тырышырга туры киләчәк. Йөзгә кызыллык китерергә ярамый. Хәзер биредә гадәти көннәрдә дә кунаклар һәм туристлар агымы өзелми. Сукмаклар тапталганнан таптала, юллар салынганнан салына. Салынып бетмәгәннәре үз көннәрен көтә. Ул көн, һичшиксез, җитәчәк. 

2024 елга планлаштырылган эшләр үтәлеше:

ОЛЫ ШЫРДАН

1. Су торбаларын алмаштыру.

2. Янгын машинасын ремонтлау һәм тоту.

3. Җирлек чикләрендә автомобиль юлларын ремонтлау һәм тоту, инерт материаллар сатып алу, объектларга техник паспортлаштыру уздыру.

4. Смета документларын әзерләү, төзелеш контроле ясау.

КЕЧЕ ШЫРДАН

1. Суүткәрү гидрантын кую.

2. Автомобиль юлларын ремонтлау һәм тоту, объектларны паспортлаштыру.

ИСКЕ ШЫРДАН

Юлларны ремонтлау, тоту, смета документларын төзү.

Җирлек башлыгы Рәис Кәримов белдерүенчә, планлаштырылганнарның барысы да үтәлгән. Шулай да, яшәүчеләрдә алар буенча сораулар калган.

– Болардан тыш, Кече Шырданда Асия Гобәйдуллина һәм грант акчасына спорт мәйданчыгы төзелә башлады, – диде башлык. – Асия Наил кызы Кече Шырданда бөтен чараларның һәм эшләрнең иганәчесе. Зур рәхмәт аңа. Көз көне шушы авылның Каюм Насыйри урамында 2,4 чакрым юлга асфальт салына башлады. Бөек якташыбызның 200 еллыгы уңаеннан 100 урынлы клуб төзүгә документлар әзерләнә. Бу уңайдан республика һәм район җитәкчелегенә рәхмәтебез чиксез. Ә менә Олы Шырданда авылдашыбыз Ислам Закиров булышлыгы белән 700 метрда зират янында вак таш җәю эшләре алып барылды. Очрактан файдаланып, сессиядә катнашкан Николай Сергеевич Бызинга рәхмәт белдерәм. Ул без җиткергән проблеманы тиз арада хәл итәргә булышты. Барыгыз да түбәсе алмаштырылган мәктәп бинасының ничек матурайганын күргәнсездер.

Үзенең хисап чыгышында башлык җирлек тормышында актив катнашкан авылдашлары Илдар Батталовка, Айзәт Талиповка һәм Андрей Митрошинга рәхмәт әйтергә онытмады.

Әлбәттә, рәхмәт ишетү рәхәт. Әмма сессиядә катнашучылар, очрактан файдаланып, сораулар да әзерләп килгән. Шулардан иң борчыганы – Кече Шырданда яңа су башнясының бөтен йортларга да суны җитәрлек күләмдә бирә алмавы. Басым җитми. Рәис Кәримов аңлатуынча, элек башня 11 метр биеклектә булган. Хәзер ул 7 метрга күтәрелгән. Басымның шул сәбәпле җитмәве дә бик мөмкин. Проблема белән Норлат ТКХсы хезмәткәрләре дә яхшы таныш. Насос куелганда хәл ителергә мөмкин ди алар. 

Язманың дәвамын газетаның №3 (24 гыйнвар, 2025) санында укырга мөмкин.