Норлат кебек зур авылда парк та булмасын инде!

Елдагыча, авыл уңганнарының күргәзмәсе тәкъдим ителде. Игътибар үзәгендә «Халык фронты» Норлат штабы во­лон­терлары махсус хәрби операциягә әзерләгән әйберләр. Ару-талуны белмәүче ханымнар һәм егетләр бүгенге көндә 24 төрдән артык кирәк-ярак тегә һәм җитештерә.
Норлат авыл җирлеге башлы­гы Илдус Саттаровның тулы чыгышы авылның яшәешен һәрьяклап чагылдырды.

Белешмә
Авыл җирлегенә 8 авыл керә
3001 кеше яши
1245 хуҗалык бар.

2024 ел норлатлылар өчен дә нәтиҗәле булган дисәм, арттырмам. Иң зур эшләрнең кайберләренә тукталып китәм:

• Норлат участок хастаханәсенә ремонт үткәрелгән;
• «Ашханә блокларын ремонтлау программасы» нигезендә мәктәпнең азык-төлек блогында зур капиталь ремонт ясалган;
• элеккеге «Ателье» бинасында капиталь ремонт тәмамланган, матди базасы ныгытылган, хәзер анда «Исток» яшьләр клублары берләшмәсе эшен дәвам итә;
• җәен су җитмәү мәсьәләсе еш күтәрелгәнгә, яңа башня куелган һәм бу эш быел да дәвам итәчәк;
• «Сәламәтлек саклау» милли проекты буенча Косякау авылында фельдшер-акушерлык пункты төзелгән. Шулай ук Косякау авылы мәдәният йортының түбәсе алыштырылган;
• Ленин урамындагы күпфатирлы 26нчы йортка капиталь ремонт ясалган;
• 260 мең сумлык уен җиһазлары: таган, таулар, комлыклар, спорт кирәк- ярак­лары, эскәмияләр сатып алып, ике балалар мәйданчыгы урнаштырылган;
• ел башында «Ак Барс» Суднолар төзү Корпорациясе» АҖ генераль директоры, ТР Дәүләт Советы депутаты Ренат Мистаховның иганәчелек ярдәме белән «Хәмзә» мәчетен ремонтлау башланып, Рамазан аенда куллануга тапшырылды.

Күп чыгымнар сорый торган күләмле эшләр башкарылган, әмма чабудан тарта торганнары да җитәрлек. Менә аларның берничәсе:

• табигатьне саклау чаралары кысаларында авыл плотинасының гидротехник корылмасы куркынычсызлыгы декларациясен эшләү планлаштырыла;
• Интернационалист сугышчыларга һәм МХО хәрбиләренә мемориаль такталар кую планда тора;
• республика программасы кысаларында Норлат авылының почта бинасына һәм Яшүсмерләр клубына керү юлы төзекләндереләчәк.

Шул ук вакытта, хәл ителми­чә калган мәсьәләләр дә юк түгел. Прибой авылына 5 чакрымга, шулай ук Норлатның Сельхозхимия урамына кадәр ике чакрымга якын юл салырга кирәк. Норлат, Татар Исламы, Прибой, Косякау авылларында табигый сулыкларга керү юллары һәм гадәттән тыш хәлләр очрагында су алу өчен пирслар төзү мөһим.

– Җирлек хакимиятенең, безнең территориядә урнашкан барлык предприятие һәм учреждениеләрнең үзара бәйләнеше бик әһәмиятле. Авыл үсешенә һәркайсыбыз көченнән килгәнчә өлеш кертсен иде, шул чакта гына уңышларга ирешәчәкбез! – дип тәмамлады Илдус Саттаров үз чыгышын.

Язмам башында әйт­кән Норлат штабы волонтер­ларының эше хакында олы йөрәкле, гаҗәеп патриотик ханым Роза Ягудина тәфсилләп сөйләде. МХОда булган егет­ләребезгә гуманитар йөк җыюда, әзерләүдә зур көч куйган норлатлыларның акти­в­­лыгын газета битләрендә, социаль челтәрләребездә даими яктыртып барабыз. Һәм аларга рәхмәттән башка сүз юк! Хисап сессиясе узган көннәрдә ялга Адель Әхмәтҗанов та кайткан иде (бу егетнең язмышын газетабызда 28 февраль са­нында яктырттык). Район башлыгы Михаил Афанасьев аны президиумга чакырып, кулын кысты, залдагылар аягүрә басып алкышлап, авылдашларына рәхмәтен һәм хөрмәтен җиткерде. Күзгә яшьләр китерә торган мизгелләр иде бу…

– Махсус операциядә катнашучы егетләребез алгы сызыкта хезмәт итә. Шундый патриот уллар һәм кызлар үстергән әти-әниләргә зур рәхмәт белдерәм. Гомумән, норлатлылар аеруча актив. Бар күңелләрен биреп, тырышып гуманитар ярдәм җыялар. Волонтерларга зур рәхмәт, – дип сүзен башлады сессиядә катнашкан район башлыгы Михаил Афанасьев. – Җирлек башлыгы үз урынында, тырышлыгын күрәбез. Мемориаль такта кую кебек мөһим эшкә алынгансыз. Ярдәм кирәк булса, булышырбыз.

Язманың дәвамын газетабызның №11 (21 март, 2025 ел) санында укырга мөмкин.