КҮҢЕЛЛЕ БУЛДЫ

Бу уеннарны яхшы уйнаучылар - акыллыларның акыллылары! Безнең Шырдан балалары да шактый гына яхшы уйный икән. Тик... шашканы. Әлегә. Киләсе турнирга шахмат уйнарга өйрәнеп киләчәкләр. Әйе, әйе, шулай сүз бирделәр!

Туры килүен генә кара әле син! Бүген авылыбызны күрергә Рәшит Нәҗметдиновның туганы Гүзәл ханым кайткан иде. Ә Рәшит Нәҗметдиновны беләсез инде ! Россиядә узган шахмат чемпионатларының 1950, 1951, 1953, 1957 һәм 1958 еллардагы чемпионы. Тарихи рекорд!

Ә бүгенге уенга килсәк. Рамил Фронович турнирның бөтен шартын китереп үткәрде. Башта разминка - шахмат уены турында викторина уздырды. Музыкаль паузаларда Камилә биеде, балалар ял итте. Тәмле паузада - Саимә апалары күчтәнәченнән авыз иттеләр. Аннары, турнир тәмамлангач, караңгы төшүгә дә, 30 градус салкынга да карамастан, тагын тау шуарга  чыгып киттеләр. Вәт бәхетле балачак!!!