Язның һәр көне кадерле

Районыбызның бер генә авылында да яшәгән тирә-юньнәрне, зират өсләрен чистарту буенча өмәләр оешмыйча калмагандыр ул.
Әнә Түбән Урысбагада тагын бер җыелганнар, авылдагы бик матур чишмә буен тәртипкә китергәннәр.

– Бу юлы олы яшьтәгеләрне – әби-бабайларны да чакырдык, барысы да җыелышып килде, аларның да читтә калмавы бик күңелле булды, – дип сөйли Түбән Урысбага җирлеге башлыгы Хәйдәр Сибгатуллин. – Эш төгәлләнгәч, шул чишмә суы белән самоварда чәй кайнатып эчтек. Урысбаганың абыс­тае, безнең хөрмәтле укытучыбыз да инде ул, Ләлә апабыз Шакирова догалар укыды, без дә аңа кушылдык, ил-көннәребез тыныч булсын дип, теләкләр теләдек. Бу өмәдә иң мөһиме, шул олыларның рәхмәт әйтүе булгандыр, әле кайчан монда төшеп чәйләр эчкән булыр идек, диләр. Бергә-бергә башкарылган эш тиз дә, нәтиҗәле дә, күңелле дә була ул. Катнашучыларга рәхмәт, алга таба да шулай бердәм булсак иде.