Яшел Үзәннең Акъегет авылында татар халкының гореф-гадәтләрен һәм йолаларын саклыйлар

- Татар халкының бик күңелле бәйрәмнәре, бай гореф-гадәтләре һәм йолалары бар. Ел фасылларына бәйле «Сабантуй», «Нәүрүз» бәйрәмнәре. Йолаларга бәйле Сабантуй бәйрәме алдыннан, авылдагы яшьләр, балалар һәм үзем мәдәният хезмәткәре булгач, бергә зур колга, бизәлгән җигүле ат белән авылның бер башыннан икенче башына җырлап йөреп бүләкләр җыябыз. Авыл халкы Сабантуйга дип бик матур бүләген алып чыга да, колгага бәйләп куя. Берничә урында тукталып, татар халкының матур биюләрен биеп алабыз. «Нәүрүз» көннәрендә йорттан-йортка кереп «нәүрүз әйтеп» йөрү гадәте булган. Бу йолалар хэзерге көннәрдә дә үз йөзен, үз төсен саклап килә. Хуҗаларны киләсе бәйрәм белән котлап, теләкләр теләп йомырка, ярмалар, җыеп йөрү бик матур йолаларның берсе булып тора. Каз өмәсе, балага исем кушу йолалары, утырма утырулар, «Сабантуй», «Нәүрүз» бәйрәмнәре бездә бик күңелле һәм зур чара итеп оештырыла. Бу бәйрәмдә бөтен авыл халкы да актив катнаша, – дип яза Акъегет мәдәният йортының сәнгать җитәкчесе Рәшидә Борһанова.

Дуслар, сезнең якта нинди йолалар бар?