Яшел Үзән районы Бакырчы авылы клубы, Акъегет мәдәният йорты, Юынчы клубы үзешчәннәре концерт программаларын тәкъдим итте
Идел аръягында «Халык талантлары» исеме астында Яшел үзән районының авыл мәдәният йортлары һәм клублары арасында уздырылучы 1нче үзешчән сәнгать смотр-конкурсы дәвам итә.
28 февраль көнне Бакырчы авылы клубы, Акъегет мәдәният йорты, Юынчы клубы үзешчәннәре үзләренең концерт программаларын тәкъдим итте. Һәр авыл да тырышып әзерләнгән иде.
Бакырчының "Хәзинә" фольклор коллективының чыгышы, Миләүшә Сәлахиеваның "Китмим әле яшьлегемнән" җыры, "Ханымнар" җыр һәм бию коллективының "Җыям карлыган җиләк " җыры һәм агач кашыклар белән көй уйнаулары күңелгә тирән үтеп керде.
Акъегет авылыннан Нотфуллин Фирдус "Ялгыз торна", Борһанова Рәшидә "Җырлыйм туган якта", Җиһаншина Гөлназ "Җиңеп кайтыгыз” җырларын бик үзенчәлекле итеп башкарды.
Юынчы авылында да җыр-моңга гашыйк кешеләр яши икән. Программаларын театральләштереп әзерләгәннәр. Хәлимова Гөлдинә Муса Җәлилнең "Вәхшәт "шигырен бик оста башкарды. Ә инде Галимҗанова Гөлфирә башкаруындагы "Тормыш җыры"н тыңлаганда күзләргә яшь тулды. Шундый матур, моңлы, үзенә генә хас бормалар белән җырлады Гөлфирә ханым. Төхвәтуллина Диләрә башкарган "Син кайтмадың " җыры да залда утыручыларны битараф калдырмады.
Юынчының үзешчән композиторы Ильшат Гайнетдиновның "Тормыш-мизгел" җыры да күңелләрдә үз эзен калдырды.
Йолдыз Шәмгунова.
Яшел Үзән
Следите за самым важным и интересным в Telegram-каналеТатмедиа
Нет комментариев