Бәчек авылында шатлыклы хәбәр

Әлеге сөенечле хәбәр белән Түбән Урысбага җирлеге башлыгы, Бәчек авылы имамы Хәйдәр Сибгатуллин уртаклашты:

-Безнең авылда киләсе елда ФАП кору каралган. Шул төзелешкә әзерлек эшләрен бүгеннән үк башладык: урынын чистарттык һәм свайларын сугып куйдылар. Аллаһ боерса киләсе елга төзеп тә куярлар дигән өметтә торабыз. Аллаһның рәхмәте белән эше башланды. Авыл халкы һәм үземнең исемнән бик зур рәхмәтләрне районыбыз башлыгы Михаил Афанасьевка җиткерәбез. Күпләр, безгә ФАП кирәк дигәч, каршы килеп, юк, бетә торган авылга нигә ул, дип әйтүчеләргә, Михаил Павлович: «Ничего подобного, Бәчеккә дә ФАП корабыз», диде. Менә, сүзендә торды, нигез дә салынды. Сөенечебез эчебезгә сыймый! Яңа елны шатлыклы эшләр белән каршылыйбыз. Дөньяларыбыз имин булсын, яхшы хәбәрләр генә ишетергә язсын!