Яшел Үзән районының язгы ташуга әзерлеге турында гадәттән тыш хәлләр комиссиясе утырышында фикер алыштылар

Аның җитәкчелегендә Шәһәр һәм район Гражданнар оборонасы эшләре идарәсе җитәкчесе Вячеслав Долганов, авыл җирлекләре башлыклары, шәһәр һәм район предприятиеләре җитәкчеләре катнашты.

Язның соңаруы, зур кар запасларында суның күп булуы, Иделнең аерым участокларында 1 метрга кадәр боз калынлыгы - болар барысы да язгы көчле процесслар вәгъдә итә. Су басу куркынычын киметү өчен, көз көне су үткәрү торбаларын чистарту эшләре башкарылган, ГТСка су төшерелгән, ләкин, шуңа да карамастан, комиссиядә билгеләп үтүләренчә, язны каршыларга әзерлек йөз процент булырга тиеш.

- Муниципалитет дәрәҗәсендә язгы ташуга әзерлек эшләре башкарылды. Республика Гадәттән тыш хәлләр министрлыгында шартлату эшләрен уздыруга алдан гариза бирелгән. 15 марттан районда елгалар дәрәҗәсен, ГТС торышын күзәтү оештырылды. Авыл җирлекләрен йөреп чыгу өчен 4 оператив төркем расланды, - дип ассызыклады Вячеслав Долганов.

Су басу мөмкин булган авыл җирлекләре башлыкларына юлларны, су үткәрү канауларын чистарту, вәзгыятьне мониторинглау, шулай ук йортларны ирекле иминләштерү буенча халык белән эшләү йөкләмәләре бирелде.

- Гомумән, язгы ташу узу белән бәйле мөмкин булган хәлләргә җавап бирергә, үз территорияләрендәге вәзгыятьне контрольдә тотарга, торак йорт идән асларыннан суны суырту буенча халыкка үз вакытында ярдәм күрсәтергә әзер торырга кирәк, - дип мөрәҗәгать итте җирлек башлыкларына Ильяс Ганиев.

Шәһәр буенча су басу белән бәйле гадәттән тыш хәлләр фаразланмый, әмма күп кенә кар запаслары аркасында күпфатирлы йортларның подвалларында һәм йорт яны территорияләрендә су басу мөмкин. Хәлне контрольдә тоту бурычы Торак-коммуналь хуҗалык департаментына һәм идарәче компанияләргә йөкләнгән.