«Яшел Үзән» бүләк уйната. Сез дә отыгыз!

«Әле газетага язылган гына идек, тагын подписка башланды дип язасыз», - дип әйтүчеләр дә шактый. Язмый мөмкин түгел, подписканың тәмамланганы да юк чөнки. Һәм газета укучыларны җыю бик авырлык белән бара. Ни өчен дигәндә, бөтен әйбергә бәя күтәрелгәндә безнең газета да бер урында таптанып тормый. 6 айга язылу бәясе аз да түгел, күп тә түгел - 600 сум. Ай-һай, 600 сум бит ул диярсез. Чынлап та, бер караганда бәясе кыйммәт кебек. Ә инде төптән уйласаң, әлеге сумма ярты ел буена алай ук кесәгә сугарлык түгел. Аена сигез газета өчен 100 сум дигән сүз. 100 сум белән кибеткә кереп карыйк әле. 1 литр сөт, бер буханка ипи һәм калган сумга балага бер чупа-чупс килә. Менә шулар белән чагыштырып карасаң, «Яшел Үзән» тамчы да кыйммәт тормый ул!

Дөрес, газетага бер язылган кеше, матбугаттан аерылмый. Ул бит магнит кебек, бер алдырган саен, гел язылып кына торасы килә. Өйгә почта килгән көн үзе бер бәйрәмгә тиң. Почта тартмасын, хат ташучы килмәдеме икән, дип әллә ничә тапкыр чыгып карау, яңа кәгазь исе аңкып торган газетаны беренче тиз-тиз карап чыгу, аннан вакыт булгач иркенләп уку, йә булмаса башкалар чишкәнче дип сканворд тутыру... Газета алдыру ләззәтен сүз белән аңлатып та, җиткереп тә булмый. Шуңа да, безнең белән бергә булып, һәр газетабызны укып, фикерләре белән уртаклашып, хатлар язып баручы укучыларыбыз яңа 2017 елда да аерылмас дип уйлыйбыз. Чөнки без сезнең өчен эшлибез, һәр язган сүзебез, фикеребез йөрәгегезгә барып ирешсен, укучыларыбызны бары уңай якка тәрбияләсен иде дип тырышабыз. Районда нәшер ителүче татарча БЕРДӘНБЕР газета бит ул - «Яшел Үзән»!