Яшел Үзән балалар бакчасында автомобильләрдән баш тарту җаен өйрәтәләр

Хәзерге вакытта без үзебезнең тормышыбызны транспорттан башка күз алдына китермәсәк тә, аның зарарлы яклары бик күп икәнен дә онытмаска кирәк. Транспорт хәрәкәте өчен кулланылган ягулык материаллары атмосфера һавасын күпме дәрәҗәдә пычратканын барыбыз да белә. Моның нәтиҗәсендә безнең сәламәтлегебезгә дә шактый зыян салына.
Шуңа күрә без, 6нчы балалар бакчасының Экологик Совет әгъзалары киләчәк буыныбызны һәм аларның әти-әниләрен бу проблема белән төптәнрәк кызыксындырырга булдык. Чөнки зур, бердәм тырышлык белән генә проблеманы чишү юлларын табып була. "Тамчыдан күл җыела" ди бит безнең халык. Менә шушы максат белән уку елы дәвамында балалар һәм ата-аналар белән бик күп чаралар үткәрелде. Шуларның берничәсен әйтеп үтәсе килә: "Автомобильдән башка бер көн", "Без чиста һава яклы" девизы астында халыкара волентерлар көне, "Әз машина, чиста һава" исемле плакатлар күргәзмәсе, "Әз машина, чиста һава" темасына эколог чыгышлары һәм башкалар.
"Эко мәктәп/ Яшел флаг" халыкара программасында катнашу буенча алып барылган эш тәрбияләнүчеләр һәм аларның ата-аналары арасында бик зур кызыксыну уятты. Алар үткәрелгән чараларда бик теләп катнаштылар. Шундый яшь буын булганда киләчәккә зур өмет белән атлый алабыз әле!

Аида Мостафина.