Халыклар бердәмлеге көне белән!

Фото: редакция архивыннан

Бу нинди бәйрәм? 

Бәйрәм календарьда 2004 елгы Федераль закон белән расланган истәлекле дата буларак беркетелгән. Ул – халык ополчениесе Мәскәүне поляк интервентларыннан азат иткән 1612 ел вакыйгалары хөрмәтенә оештырылган. Киңрәк мәгънәдә Халыклар бердәмлеге көне кризислар алдында җәмгыятьне берләштерүнең мөһимлеген ассызыклый. Бу тарихи дата гына түгел, ә халыкның, тышкы һәм эчке тынычсызлыкларга карамастан, үз-үзен оештыру һәм дәүләтчелекне саклап калу сәләте турында искә төшерү.

Ни өчен аны 4 ноябрьдә билгелиләр? 

Тарихи яктан бу дата XVI йөз ахыры — XVII йөз башы Россия тарихында фаҗигале булган «Болганчык чор» («Смутное время») тәмамлану белән бәйле. Бу көн халык ихтыярының чит ил тыкшынуын һәм эчке таркаулыкны җиңүе, илнең сәяси генә түгел, рухи яңарышы символына әверелде. Бәйрәм 1649 елдан патша Алексей Михайлович фәрманы буенча гамәлгә кертелә.

Халыклар бердәмлеге көне тарихы 

Көн Кузьма Минин һәм Дмитрий Пожарский җитәкчелегендәге халык ополчениесе Мәскәүне чит ил гаскәрләреннән азат иткән 1612 ел вакыйгаларына туры китереп билгеләнгән.   

Хәзерге Россиядә бәйрәм ничек яңартылган?

Бәйрәмне 1649 елдан 1917 елга кадәр билгелиләр. Советлар Союзында аңа алмашка Октябрь инкыйлабы көне, 7 ноябрь килә.

Тарихи датаны кайтару идеясе 2004 елда туа — инициатива белән Россиянең Дин-ара Советы чыгыш ясый. Дәүләт Думасы тәкъдимне хуплый һәм 2005 елдан 4 ноябрьдә Халыклар бердәмлеге көне рәсми рәвештә билгеләп үтелә башлады. Бу дата, шулай ук, Россиядә рәсми ял көне ителде.

Бәйрәмнең әһәмияте һәм мәгънәсе 

Халыклар бердәмлеге көне гражданлык җаваплылыгының, үзара ярдәмләшүнең һәм авыр вакытларда бергәләп эш итәргә әзер булуның мөһимлеген ассызыклый. Ул халык бердәмлегенең тарихи хәтер генә түгеллеген, ә милли тотрыклылык һәм үсеш нигезе булуын, җәмгыятьнең көче – каршылыклар алдында берләшүдә икәнен, ә уртак үткәннәргә хөрмәт – бердәм киләчәк өчен нигез формалаштыруын искәртә.