Узган тәүлектә Татарстанда коронавирусның 83 очрагын ачыклаганнар

Татарстан Республикасында бер тәүлек эчендә Covid-19 коронавирусының тагын 83 очрагы рәсми рәвештә расланды.

25 кеше ашыгыч рәвештә хастаханәгә озатылган, 58 кеше медицина хезмәткәрләре күзәтүе астында дәвалануда кала.

Коронавирус йоктыруның яңа очраклары төбәкнең 16 муниципалитетында ачыкланган. Авыруларның күпчелеге Казанда теркәлгән (48). Җиде очрак Чаллыда, дүрт очрак - Түбән Кама районында. Яшел Үзән районында - 3 очрак расланды.

Соңгы тәүлектә 69 кеше терелде. 4 февральгә татарстанлыларның коронавирустан зарарланган гомуми саны 16 385 кешегә җитте.

Исегезгә төшерәбез, кичә республиканың Сәламәтлек саклау министрлыгы рәсми рәвештә Татарстанда инфекциядән тагын биш кешенең гомере өзелүе турында мәгълүматны раслады. Шулай итеп, коронавирус инфекциясеннән үлүчеләр саны Татарстанда 283 кеше.