Татарстанда 15,5 меңнән артык мәдәният волонтеры бар

Фото: © Татарстан Мәдәният министрлыгы

Хәрәкәтнең җирле бүлекләре биш районда һәм Казан шәһәрендә ачылган. Шулай ук Роберт Миңнуллин исемендәге Республика балалар китапханәсе һәм Н.И. Фешин исемендәге Казан сәнгать училищесы базасында мәдәният волонтерлыгы үзәкләре эшләп килә. Бүгенгә көндә волонтерлар китапханә чараларын оештыруда катнаша, социаль инициативаларны тормышка ашыра һәм хәйрия акцияләре үткәрә.

2025 елның өченче кварталында гына республикабызда мәдәният волонтерлары катнашында 1,2 меңнән артык чара уздырылды.

Татарстан Мәдәният министрлыгының өстенлекле бурычларының берсе – Ватанны саклаучылар елында мәдәният волонтерларын истәлекле урыннарны, мемориалларны һәм һәйкәлләрне саклауга, популярлаштыруга җәлеп итү. Бу юнәлеш Бөек Ватан сугышында Җиңүнең 80 еллыгын бәйрәм итү елында аеруча актуаль, дип билгеләде Татарстан Республикасы мәдәният министры урынбасары Дамир Натфуллин.

«Мәдәният волонтерлары» хәрәкәтенең Татарстандагы бүлекчәсе бөтен Россия буенча иң актив һәм алдынгыларның берсе санала. Республикабыз берничә тапкыр «Иң яхшы мәдәни волонтерлар төбәге» дип танылды һәм мәдәният волонтерлары саны буенча илнең беренче унлыгына керде.

Регион бүлекчәсенең җитәкчесе Гөлфия Мотыйгуллина «Мәдәният волонтерлары» программасын уңышлы гамәлгә ашырган өчен Россия Мәдәният министрлыгының Рәхмәт хатына һәм «Россия волонтеры» күкрәк билгесенә лаек булды.

«Ярдәм итүче кешеләргә үрнәк булу – минем тормышымдагы иң мөһим миссия, дип уйлыйм. Хөкүмәтебезгә рәхмәт, минем 20 еллык волонтерлык эшчәнлегемне югары бәяләгәннәре өчен. Быел минем төп проектларымның берсе – «Я — ДоброТворец»ка 10 ел тулуны югары дәрәҗәдә билгеләү бик рәхәт. Мондый бүләккә күпләр лаек, әмма яраткан республикабызда түгел, ә илдә беренчеләрдән булу чыннан да горурлык китерә», – диде Гөлфия Мотыйгуллина.

Бу елның сентябрь аенда «Мәдәният волонтерларының» җирле бүлекчәләре яшьләре һәм активистлары өчен «МКМ: Яшьләр Мәдәният Менеджмент 2025» Республика форумы уздырылды. Анда республиканың 19 районыннан 40 мәдәният волонтеры катнашты. Форум кысаларында очрашулар һәм мастер-класслар узды, шул исәптән Татарстан мәдәният министры урынбасары Дамир Натфуллин белән дә очрашу оештырылды. «Мәдәният волонтерлары» хәрәкәтенең Федераль дирекциясеннән 14 рәхмәт хаты тапшырылды, ә 2030 елга кадәр «Мәдәният волонтерлары» хәрәкәтен үстерү стратегиясе кысаларында биш яңа уникаль проект эшләнде.