1 июльдән ТКХ тарифлары арта

Торак-коммуналь хуҗалыгы тарифларын индексацияләү 1 июльдән бөтен Россия буенча узачак, шул ук вакытта Татарстанда ул башка төбәкләргә караганда югарырак та булачак. Бу хакта Дәүләт Думасының төзелеш һәм торак-коммуналь хуҗалык комитеты әгъзасы Александр Якубовский хәбәр итте.

Ил буенча индексация күләме 11,9 процент тәшкил итәчәк, Төньяк Осетиядә тарифлар 19,1 процентка, Чиләбе өлкәсендә һәм Мордовиядә - 18 процентка, Татарстанда һәм Дагыстанда - 17,5 процентка индексацияләнәчәк.

Тагын да югарырак индексация Архангельск өлкәсендә (20 процент), Пермь краенда (21,1 процент), Кемеров өлкәсендә (19,8 процент) булачак.

Индексация таушалган коммуналь инфраструктураны модернизацияләү, ресурсларга һәм инфляциягә бәяләр арту белән бәйле, дип ачыклык кертте депутат.