Тарих мәңгелек

Бу вакыйга шул төбәк халкы тарафыннан күптән көтеп алынган иде. Архивларда сакланып калган материаллар белән халык арасында сакланып калган тарихи хатирәләрнең бергә туп­лануы нигезендә туган бу хезмәт һәр кешенең үз тарихы итеп кабул ителде. Кешеләрнең үткәнгә ихтирамы, аңа мохтаҗлыгы һәрберсенең күзендә чагыла иде. Халык галимнәрне йотлыгып тыңлады, үзе сөйләде, фикерләр алышу булды. 
Институт хезмәткәрләре Эльмира Сәлахова, Айдар Гайнетдинов, Халидә Баһаветдинова авыл тарихын өйрәнү максаты, бурычлары турында сөйләде, авыл тарихын өйрәнүдә ярдәм булырлык чыганаклар хакында да сүз алып барды, киләчәккә актуаль проблемалар билгеләнде. Шулай ук, галимнәр бу як тарихына караган яңа ачышлар белән таныштырдылар. 
Шул як тарихын язган төбәкчеләр дә сүз алды. «Бакырчымда таңнар ата» хезмәтенең авторы Рәйханә ханым Зәйнуллина, «Акъегет авылы тарихы сәхифәләре» авторы мәрхүм Илгизәр Тимершинның кызлары Ләлә һәм Ильмира ханымнар, укытучы Гөлсинә Борһанова, Акъ­егет, Бакырчы имамнары һ.б. чыгыш ясады. Алар балачакта бу авыллар үткәне турында әби-бабаларыннан ишеткән мәгълүматлар белән бүлеште. Очрашуга килгән һәр кеше үз сүзен, фикерен, тәкъдимнәрен җиткерә алды. 
Нәсел тамырлары белән Акъегет авылыннан булган, Г. Тукай премиясе лауреаты, Надир Усман улы Әлмиев очрашуның кадерле кунагы иде. Ул әтисе – Госман Әлмиев турындагы хатирәләр белән уртаклашты. Кунаклар Акъегет мәктәбендәге Госман Әлмиев һәм туган як музее белән танышты. 
Бу чараның иң дулкынландыргыч мизгеле XIX йөз ахыры – XX башы татар бае, мәгърифәтче, күренекле химаяче Заһидулла Шәфигуллин йортын карау булгандыр. Бу йорт шул чорның истәлеге, анда шул чорның рухы әле дә саклана кебек. Бу бина инде хәзерге вакытта мәчет буларак кулланыла, шунда ук аңа багышланган кечерәк кенә музей да эшләнгән. Шулай ук мәктәп музеенда да Заһидулла Шәфигуллин белән бәйле экспозицияләр куелган, анда аның кызы Әсма ханымның үзе бүләк иткән камзолы саклана. 
Әлеге хезмәтне эшләгәндә ярдәм иткән һәм китапны тәкъдим итүне оештырып йөргән «Ак калфак» оешмасының Яшел Үзән бүлекчәсе җитәкчесе, Акъегет авылы мәктәбенең элекке директоры, хәзерге вакытта Осиново бистәсе гимназия­сенә җитәкчелек итүче Гөлинә ханым Саттаровага зур хөрмәтебезне һәм ихтирамыбызны белдерәбез. Акъегет авылы мәктәп коллективына, аның директоры Ләйлә Гаязиевага бу чараны оештырулары һәм ихлас итеп уздырулары өчен рәхмәт. 
Авторлар, китапка материал туплый башлаганның беренче көннәреннән ярдәм күрсәткән, чыгышы белән Бакырчы авылыннан булган, техник фәннәр кандидаты Рафикъ Сәлахиевка, Күгеш авылы башлыгы Альберт Гатауллинга һәм башкаларга, авылның барлык кешеләренә рәхмәтле. 

Ш. Мәрҗани исемендәге Тарих институтының ТР халыкларының тарихи-мәдәни мирасы бүлеге