Сәрхүшләр – проблемасыз. Ә балаларына юл кая?!

Әлеге проблема, барлык җирдә булган кебек, безнең районда да бар һәм социаль-мөшкел хәлгә төшкән андый гаиләләр, профилактик тикшерүләр барышында ачык­ланып, компетентлы ведомстволар күзәтүе астына алына, учетка куела. 2016 ел ахырына исәптә 171 балигъ булмаган балалы шундый 98 гаилә торган. Әлеге сабыйлар сәрхүш, наркоман һәм беркайда да эшләмәүче ата-ана­лары белән көн итәргә мәҗбүр. Оясында ни күрсә, дигән гыйбарә юктан гына тумаган, тәрбиянең «т» хәрефен дә күрмәгән әлеге ярымкыргый балалар, әлбәттә, үзләре дә кечкенәдән үк тарта, эчә, урлый, хәтта зуррак җинаятьләргә дә бара. Кайчакта гына дип әйтү дөрес тә булмас, күпчелек очракта мондый гаиләләр белән эшләү дә бернинди уңай нәтиҗә бирми. Чөнки, айныганнан соң тормышларының тирән упкын кырыенда торганлыгы күренә һәм бу проблемадан бары тик эчеп котылып була. Алар өчен чыгу юлы шул...

Яшел Үзәндә 2017 елның март аена ведомство­ара исәптә 64 гаилә тора, аларда 102 балигъ булмаган бала яши. Ике гаиләне ата-ана хокукыннан - өлешчә, ә 4 гаиләне бөтенләй мәхрүм итү өчен документлар әзерләнә. Социаль-куркыныч хәлгә төшкән һәр гаиләгә ярдәм чаралары оештырыла: алкоголизмнан дәвалау, эшкә урнаштыру, тормышларының авыр факторларын киметү өстендә эшләү; балаларын ел саен шифаханәләрдә, сәламәтләндерү лагерьларында ял иттерү, аларның гомум белем бирү учреждениеләренә йөрүләрен контрольдә тоту, спорт секцияләренә, төрле түгәрәкләргә җәлеп итү. Гаиләләргә шулай ук кием-салым, әйберләтә, продуктлата һ.б. ярдәм күрсәтелә.

- Ведомствоара комиссия тарафыннан агымдагы елда профилактик максат белән 17 рейд ясалды инде. Әлеге эш барышында янгын куркынычсызлыгына, коммуналь хезмәт функцияләренә, ТКХ хезмәтләре, ут һәм газ өчен бурычларга игътибар ителә. Килеп туган мәсьәләләр буенча консультация бирелә, - дип ачык­лык кертте Яшел Үзән социаль яклау бүлеге җитәкчесе Гүзәл Нуриева.